黃之鋒為乜要絕食？

學聯、學民「老點」示威者衝擊政總，搞到好多人受傷被捕，佢哋就承認失敗仲向「戰友」道歉。向「戰友」道歉，即係向並肩作戰既人道歉，但周永康、黃之鋒都無上戰場，配得上叫其他人做「戰友」咩？同埋咁多人受傷被捕，受傷可能有永久傷痕，被捕既可能留案底，唔好話一句道歉，就算講一萬句道歉，都彌補唔到造成既傷害。至於黃之鋒話自己無限期絕食，大家要明白，絕食係有一條方程式既。

廣男記得之前有啲建制派人士絕食，好多泛民支持者笑人哋絕食一陣就停，仲係咁叫人絕食到底，千祈唔好放棄。照咁講法，黃之鋒絕食，係咪都要叫佢唔好停，真係絕食到政府重啟五部曲為止？一向做事不留情面既黃之鋒，喺呢個時候選擇打悲情牌絕食，又為乜呢？

根據廣男既觀察，通常絕食者絕食頭三、五日都勉強頂得住，去到近十日、八日左右，絕食者就會開始體力不支，然後醫生就會作出勸告，最後絕食者就會聽從醫生建議，停止絕食，入院檢查。除非一個人絕食至死，否則要做到無限期絕食近乎無可能，黃之鋒等人成日話政府用「語言偽術」，而家佢話自己會無限期絕食，會唔會先係「語言偽術」呢？

至於黃之鋒點解要打悲情牌絕食，恕廣男講得陰謀論啲，黃之鋒咁做，似係為咗自己個「光環」多啲。打從佔領行動開始，黃之鋒雖然登上《時代雜誌》封面，但自己响香港人心目中既形象越嚟越差，到前日學民同埋學聯叫人圍政總，講白啲就係推人去死，相信連唔少支持者對佢都有不滿，與其話絕食爭普選，不如話係絕食爭「光環」。

明知絕食唔可以迫政府甚至中央讓步，黃之鋒喺支持度大跌既時候毅然絕食，唔係為普選咁單純呀？ ■