政總門外搭木屋 示威原來真係大晒

香港房屋問題嚴峻，不過要解決其實一啲都唔難，是是旦旦喺條街度搭間木屋住就得啦！囍雨唔係講笑，喺條街度搭木屋真係冇問題喎，只要你打住「民主」旗號就乜都得喇。

就早幾日之嘛，有傳媒就發現總府總部外既街道，出現咗多間相信係由示威者搭建既木屋，部份更加整到好似木製碉堡咁，實在令人「嘆為觀止」。據講，政府總部外既帳篷陣自從舊年既「違法佔領」後已經一直存在，近日仲有愈來愈多之勢添。

哦，明晒啦，原來今時今日打住「民主」旗號就乜都得，法律呀、規矩呀等等都可以拋埋一邊唔使理。民主嘛，大晒架，霸住條街又得、無啦啦喺條街度搭間木屋又得，總之法律唔容許咩？對其他市民帶來不便咩？掟「民主」兩個字出嚟 – 得咗！

之前將帳篷放喺條街「示威」，今日竟然可以喺條街度起木屋，下次唔知會發展成點呢？會唔會有人打住「民主」旗號，喺公用地方起個瞭望台出嚟，反監視警方同其他執法人員架？

瞭望台可能誇張啲，但昔日搭喺山邊山頂既木屋陣就的確大有可能，計囍雨話，嗰啲示威者喺條木屋村建成後，不如直接將啲木屋間成「劏房」出租畀其他人啦，打住爭取「民主」旗號咪得囉，冇事架喎。

一個真正自由民主既社會，互相尊重可以話係重要條件之一，簡而言之，表達意見亦要尊重別人需要。自稱爭取民主既示威者，你哋係唔係仲要過份落去，自己諗啦。■