非建制記者會言論 荒謬至極

日前成班非建制議員同立法會議員劉小麗一齊開記招，民主黨涂謹申劈頭就話，特首梁振英就劉小麗宣誓入稟司法覆核係「旁門左道」。吓！法庭同司法程序都叫旁門左道？我冇聽錯吓話？咁身為香港律師嘅涂謹申，都係旁門左道嘅一部份啦！

更荒謬嘅係，劉小麗話特首誓入稟司法覆核係剝奪佢嘅「選民授權」，同時係特首嘅選舉工程。首先，佢嘅選民係授權佢入去議事，唔係宣誓「玩嘢」，如果佢同梁、游宣誓當日無「玩嘢」，安安份份咁讀晒啲誓詞，根本無人可以取消佢地議員資格，而家已經喺議事堂代表緊選民發聲啦。

再者，香港冇人可以凌駕法律，就連民選議員都唔可以。議員係「依法」選出，亦要守法，劉小麗如果最終被裁決違法而被褫奪資格，呢個亦係民主同法治一部份，好心劉小麗就唔好再呃香港人啦。事實上，剝奪佢嘅選民授權唔係其他人和事，而係劉小麗自己！一切都係咎由自取！

講到特首司法覆核佢係選舉工程，呢個仲荒謬。囍雨想問，「青年新政」同劉小麗，佢哋邊個收到特首「柯打」喺宣誓時「玩嘢」？冇吖嘛！既然無收到「柯打」，咁即係自發搭個棚幫特首「助選」啫（雖然特首會唔會競逐連任都唔知！）！心水清嘅都知，「玩嘢」主動權喺佢哋手，佢哋唔玩，特首根本冇可能司法覆核，根據劉小麗邏輯，如果司法覆核係選舉工程一部份的話，劉小麗咪主動幫特首做選舉工程囉？

香港係一個「法治」社會，人人都要守法。宣誓係一個莊嚴嘅法律程序，《基本法》同《宣誓及聲明條例》都寫得好清楚，拒絕／忽略宣誓後果就係「取消資格」，既然劉小麗選擇得喺宣誓「玩嘢」，就應該預咗「取消資格」吖！又想玩嘢，又要凌駕法律，你劉小麗咪「威過威士忌」？■