本港老牌盲反派政黨民主黨，一向畀人感覺係「和平、理性、非暴力」，不過自從佢哋嘅成員高調參與「違法佔領」，入到立法會又經常「橫衝直撞」，所謂「和理非」早已經蕩然無存。不過，「沒有最差，只有更差」，新聞報道話民主黨議員許智峯「涉嫌」喺立法會搶咗一個政府人員部手機，隔咗相當一段時間後先至歸還，呢位政府人員最終報警處理；睇到呢單新聞，囍雨就諗，唔通民主黨已經升Level做咗「老笠黨」？
為搞「流會」搶手機？
是咁的，說話噚日立法會開會傾高鐵「一地兩檢」方案，盲反派議員毛孟靜喺朝早十點幾就要求「點人數」，據報有名政府女性EO（行政主任）曾經用手機通知唔喺會議室裡面嘅議員嚟開會，許智峯見到咁就突然搶走EO嘅手機入咗男廁，隔咗一輪先畀番部手機人哋。由於已經報咗警，案情嘅嘢囍雨就唔方便評論，但許智峯身為立法會議員如果真係犯法，明顯就「罪加一等」啦。
間接承認自己搶手機？
成件事最「趣」嘅地方，係許智峯回應事件嘅時候，除咗認「獲得」手機之外，仲話發現有立法會議員「私隱」被侵犯咁話，將會喺日內交代事件。問題就嚟喇，如果許智峯冇搶咗人部手機、仲擅自開人部手機去睇，佢又點知部手機裡面有咩資料呢？而家情況係，似乎有人未得政府職員同意，擅自拎走咗部手機（唔知係唔知偷啦，呢個等警方去查），再要非常冇品地開人部手機去檢查當中內容，先唔好講有冇違法，如果許智峯真係有咁做的話，莫講話議員，佢連做一個普通人應有嘅基本品格同誠信都冇，可以話係非常可恥。
今次已經唔係許智峯首次疑似「出事」，佢雖然係民主黨議員，但行為極之偏激，好似舊年年底立法會審議緊修改《議事規則》嘅時候，盲反派班議員衝去主席台前，當時許智峯就試過阻撓保安做嘢，事後仲畀人批評佢涉嫌襲擊保安。今次許智峯仲「涉嫌」搶嘢，囍雨真係想知，如果佢被追究起上嚟又被定罪，係咪應該主動辭職呢？真係拭目以待！■
Be the first to comment