啱啱過去嘅週末及週日，一班本土派政客藉著港珠澳大橋開通、到訪東涌嘅旅客突然增加嘅機會，聯群結隊操去東涌搞「光復」行動，一副唯恐天下不亂嘅衰樣。據報道，班本土派除咗玩踩場狙擊之餘，仲執法者上身、質問啲內地領隊係咪有本地旅行社接待、要求本地導遊出示導遊證，又自行點算聲稱違規團嘅數量，搞到有內地領隊因為被包圍以致同團友失散而淚灑當場，需要由警員護送離開。囍雨喺度諗喇，班本土派玩狙擊同包圍，呢種手法根本於是無補，而且仲搞到學人扮香港執法者去查人牌，行為踩界，其實同流氓都冇乜分別。
意見不同不等於可以肆無忌憚
東涌突然之間旅客大增，毫無疑問對當區居民造成極大影響；將心比己，如果囍雨所居住嘅社區突然嚟左一大批旅客，囍雨都會覺得唔方便，甚至會對反感添；但係，咁樣並唔代表班本土派去狙擊、包圍其他人係啱嘅，呢類人流管理工作，一定係要由特區政府部門同執法者去做，因為佢哋先至有調查同執法權，而家班本土派去去查人哋有冇本地旅行社接待、去查導遊牌，咁即係做埋香港警察嗰份，咁同行私刑有咩分別呢？如果佢哋個邏輯係能夠成立嘅話，唔通第時人人一個唔鍾意，就可以隨便包圍人、甚至查人身份證？
另一個問題，大家要睇下呢班狙擊內地領隊嘅本土派係咩人，除咗地區組織「東涌人」召集人王進洋之外，譚凱邦係「新民主同盟」荃灣區議員、梁金成係「北區水貨客關注組召集人」，仲有「學生獨立聯盟」陳家駒以至衝擊理大領導層嘅理大學生何俊謙，一干人等本身同東涌亦冇咩關係，即係話呢個並唔係地區居民自發行動，反而似係本土派、「港獨」派藉機搞事多啲！
本土派、「港獨」派雲集 一定有陰謀
見到呢班本土派、「港獨」殺入東涌，其實唔難估到佢哋嘅陰謀。本土派明顯係想先喺東涌地區「炒起」反內地旅客嘅風氣，到明年區議會換屆選舉時「收割」成果、增加勝算；再推高一層，梗係用呢個新界西嘅大議題幫自己或者自己友喺未來嘅立法會選舉「助威」啦！一班講到明要搞本土甚至「港獨」嘅政客，難得可以借住港珠澳大橋通車、內地旅客增加呢個議題「炒作」，佢哋一定會傾盡全力嚟反建制派、反特區政府、反內地香港基建甚至反中央！
香港市民，囍雨知道旅遊配套不足、旅客增加，的確會令到市民不滿，但大家千萬唔好因為一時唔開心，而盲目咁投票畀呢班本土、「港獨」政客，否則只會後悔莫及，香港萬劫不復。與其附和呢班人去做SHOW，不如切身諗諗有咩計仔可以疏導旅客，做到WIN WIN「雙贏」啦！■
Be the first to comment