警察擺「空城計」？

喺呢個動輒得咎嘅時代，政府、警察做咩，都會俾政客用陰謀論角度批判，警察清場，佢哋話用過度武力唔啱；警察先退一步以避免衝突，佢哋可以話係警察「設局」，擺「空城計」陷害示威者。廣男今日睇新聞，見到有關噚日一班暴徒「攻入」立法會嘅新聞，民主黨立法會議員尹兆堅形容警方撤退「不尋常」，質疑呢個係一個「局」；工黨立法會議員張超雄就認為警方係擺「空設計」，稱對方要清場，下午已可做到云云。清場又唔得？唔清場又話唔得？入去立法會保護你又唔話唔駛？唔入去幫你頂住又唔得？咁即係想點？

若「人踩人」誰負責？

當張超雄搬出「空城計」三個字嚟屈警方「設局」嘅時候，大家首先要明白立法會當時到底係咩環境。綜觀噚日嘅電視直播以及唔同嘅新聞報道，大家會睇到果個只可以企百幾至二百人嘅立法會大堂，警員加衝入去嘅數百示威者，隨時會發生「人踩人」意外，加上之前有人投擲白色毒粉末同放火在先，當中如果有人重施故技，到時肯定大家「一鑊熟」；如果真係有悲劇發生，到時啲盲反派議員又會將責任推俾邊個呢？

誠如警務處處長盧偉聰所言，由於立法會地形所限，根本難以使用一啲喺室外用到嘅武力，加上當時有示威者「搞電箱」，一旦完全失去室內照明，會造成「人踩人」嘅危險情況，而示威者向警方投擲白色煙霧，警方喺無辦法下唯有暫時撤離，再部署點處理。簡單而言，就係現場風險極度，警方之所以要撤離，係基於安全兩個字，張超雄所謂「空城計」，俗啲講只係盲反派用啲「易記」、「易入口」嘅詞語嚟屈警察！

想警方用武力清場？

廣男想指出，當盲反派政客講到警方喺立法會撤離「有陰謀」咁款，咁如果警方喺班暴徒衝入立法會嘅時候就採取強硬手段，盲反派政客又會點講法呢？根據佢哋過往嘅說法推斷，肯定又會話警方使用過度武力對付「手無寸鐵」嘅「和平示威者」啦！當班政客不斷強調警方「設局」嘅時候，大家應該問番呢班盲反派政客一句，佢哋係咪好想警方盡快清場，同暴徒起衝突，等佢哋可以繼續「有水抽」？

噚日警方選擇喺深夜清場，結果喺幾乎無流血嘅情況下解決事情，呢個結果引證咗警方決定同部署正確，一班政客噚日全日喺度抽「政治水」、「攞光環」，到底係真想和平，定係想有衝突發生，廣男唔知；但有樣嘢廣男肯定嘅，就係一直鼓吹違法達義歪風嘅，正正就係大家眼前嘅呢班政客！ ■