由旺角暴動開始，啲人喺討論暴力示威問題時，有個命題就係「掟磚頭會唔會掟死人」，好多人都話會，而盲反派、縱暴派就覺得掟磚頭唔係咩咁「大件事」；噚日喺上水，一名七旬清潔工喺街頭被磚頭掟中，送院救治到下午出現腦幹死亡迹象，情況危殆。囍雨睇相關片段，見到黑衣人向呢個伯伯迎面掟磚，但網上面有網民竟然話係「藍絲掟親自己友」、「成條片淨係見到藍絲丟磚」；囍雨想問下，依家疑似黑衣暴徒「殺人」，佢哋唔譴責仲要屈其他人，呢啲係咪「殺完人，再嫁禍」先？真係沒有最無恥，只有更無恥！
有片有真相
對於伯伯中磚倒下果條片，無論係長約一分鐘嘅原片，抑或放大咗有幾秒長嘅片段，囍雨睇咗十次八次；成個畫面就係兩班人互相掟磚，中磚伯伯喺中間，片段所見唔覺伯伯有掟磚行為，突然一個黑衣人衝前向伯伯面部掟磚，伯伯面部「中磚」向後倒地，好可能係後腦落地。如果大家將呢啲片段都睇清楚啲，就會發現指事件係「藍絲從後掟磚」擊中伯伯，但伯伯當時「唔係向前倒下而係向後倒下」嘅事實，足以證明假如從後掟磚擊中伯伯，佢必定會向前失平衡，所以根本就唔合邏輯！一班埋沒良知嘅反政府人士，可以話係為咗屈人而喪盡天良！
掟磚頭 會死人
發生呢單「殺人案」，囍雨第一樣想講嘅就係磚頭絕對可以係殺人嘅武器，當依家啲暴徒將掟磚變為「家常便飯」後，大家必須要明白，如果再縱容佢哋，即係縱容「殺人」事件繼續出現；另一個問題，就係發生咗「磚頭殺人案」，點解一啲素來聲稱自己反暴力嘅政客，完全唔出聲嘅呢？係咪佢哋已經默許咗割頸、燒人、掟磚呢啲「冷血謀殺」行為，甚至成為咗暴徒嘅一分子？
當暴徒暴力不斷升級，囍雨請各位市民唔好再保持沉默，因為沉默只會換嚟更多、更嚴重嘅暴力事件甚至「殺人」事件；今日中磚嘅唔係大家或者大家身邊嘅人，咁下次呢？下次中磚、中汽油彈以至喺車廂受到恐襲嘅人，隨時可能係大家，所以大家再無沉默嘅餘地。至於施暴者、「謀殺者」，唔好再講你哋有咩訴求要爭取，因為無人可以因為爭取任何政治訴求而「殺人」，亦無人可以因為咁而剝奪其他人嘅自由，如果你哋尚有良知，就馬上收手啦！ ■
Be the first to comment