一場反修例風波，令所有反政府人士全部「蒲頭」，各界驚見原來要「政治中立」嘅公務員，都有唔少係反政府嘅；近日由「醫管局員工陣線」發起嘅醫護罷工，就更加「奇奇怪怪」，明明係醫護人員要罷工，但囍雨就見到兩個「前空姐」政客走出嚟一齊開記者會，到底所謂「醫管局員工陣線」（下稱「陣線」），係咩葫蘆賣咩藥？佢係一個關心醫護嘅組織，定係由頭到尾都係因為反政府而催生嘅「政治組織」？
關「前空姐」咩事？
噚日囍雨睇「陣線」嘅「要挾罷工」記者會，感覺十分古怪，理論上一班醫護要罷工，咁出嚟開記者會嘅，應該係一班醫護人員先啱，點解喺「陣線」嘅記者會上面，會有「前空姐」、職工盟主席吳敏兒喺度呢？醫護罷工關一個喺英航搞工運、長期告病假，喺英航取消香港基地時被「炒魷」嘅人咩事？？如果話吳敏兒因為職工盟身份所以在場，囍雨又想問，坐喺吳敏兒隔離嘅港龍前空姐施安娜（去年被港龍解僱），佢又關醫護罷工咩事？囍雨唔敢講話「陣線」開記者會果時為咗「湊人數」而叫埋啲「前空姐」出嚟，但「醫護加空姐」搞醫護罷工，呢個組合好明顯另有意思。
其實，撇除「陣線」記者會有「前空姐」出現呢個怪現象，「陣線」本身嘅領導一樣令人起疑。佢哋嘅主席余慧明比人踢爆根本就唔係前線醫護，而只係負責同資訊科技部門協調嘅醫療信息主任；至於佢哋嘅副主席羅卓堯，據報之前直頭係學聯嘅核心人物，喺違法佔領前後時期共被捕三次。當一個非前線醫護人員加上反政府學生組織前代表走埋一齊「威迫」政府，如果仲話呢件事係「醫護事件」咁簡單，真係未必令人相信。
「陣線」因「三罷」行動而起？
囍雨本住求真精神，上去「陣線」嘅社交平台睇下佢哋到底搞邊科，睇過佢哋喺唔同時期嘅發帖，發現佢哋雖然都不時講下醫療、工會嘢，但唔少內容好多都係講政治，例如喺去年12月，佢哋就有個「公告」講到明，「我們現正籌組嶄新的工會去支持全港三罷和解決醫管局內部的種種問題，希望大家多多支持及向我們提出意見」、工會宗旨包括「堅決守護醫管局職員政治權利及言論自由」，即係籌組工會，部分原因係因為反政府嘅「三罷」行動，而當時香港未出現武漢肺炎患者；到今年1月1日，佢哋亦嚮應民陣嘅「元旦大遊行」，幫手喺社交平台「吹雞」。囍雨認為，當一個所謂「工會」或者「陣線」，會因為政治理由而嚮應「三罷」甚至成立工會，依家有疫症出現，佢哋罷工真係「好正常」；呢個醫護「陣線」表示要保護醫護人員而發起罷工，囍雨覺得當中嘅政治味道，其實都好明顯喇！ ■
Be the first to comment