為罷工而罷工

特區攻府宣布新措施，由2月8日起無論係香港人抑或內地人、外國人，佢哋由內地返港都要接受14日嘅強制檢疫，回應咗部分市民嘅訴求；不過，不「全面封關」誓不休嘅「醫管局員工陣線」，竟然仲話要繼續罷工，被人質疑係「為罷工而罷工」。囍雨就喺度諗，其實「陣線」嘅核心成員，到底佢哋係為醫護、香港人，定係只係一心想拖香港後腿，癱瘓政府甚至香港呢？

與黑暴運動如出一轍

大家可能同囍雨一樣，覺得呢種堅持「罷工」嘅手法似曾相識，無錯喇，依家班醫護堅持罷工，感覺同之前黑暴運動嘅所謂「大罷工」手法，完全係如出一轍，前者喺政府宣布強制檢疫之後堅持罷工，後者就喺政府宣布撤回《逃犯條例》修訂後繼續搞事、煽動罷工，成件事嘅政治操作感極強，問題在於，呢班人到底要玩到幾時，如果疫症真係出現社區爆發而佢哋依然罷工，咁佢哋好明顯就係為咗政治而罔顧人命。

事實上，「陣線」副主席羅卓堯曾經講過，當出現社區大爆發就會呼籲會員返回工作崗位，但係呢幾日出現嘅三宗個案都屬於本地感染，如果佢哋信守承諾，就應該即刻返回工作崗位；不過，「陣線」竟然自打咀巴，依家又話「絕不接受有同事作無辜犧牲」，咁即係點？即係無論如何都繼續罷工？

最緊要不被秋後算帳？

如果大家有留意「陣線」代表近日嘅言論，都會不時聽到佢哋要求醫管局、政府唔好對佢哋秋後算帳，但囍雨又唔明白，如果佢哋僱主即係醫管局根本唔同意佢哋罷工，佢哋其實係曠工先真，咁醫管局點可以唔同佢哋算帳呢？今日有醫護因為政治原因曠工而「無事」，咁第時醫管局仲點管理咁多行政、支援以至醫護人員？

囍雨喺度作出一個大膽估計，就係呢班「陣線」嘅年輕代表，已經洗濕咗個頭，甚至背後有人根本唔俾佢哋依家「退落嚟」，因為依家返回工作崗位，又未「爭取」到醫管局唔處分佢哋，一個二個薪高糧準嘅醫管局員工，隨時加入「失業大軍」。不過公道啲咁講，「出得嚟行，預咗要還」，要曠工又唔想被處分，仲要一邊領公帑嚟搞事，呢個世界有冇咁著數呀？如果囍雨係醫管局管理層，處理佢哋一定從嚴不從寬！ ■