古語有云：「一鼓作氣，再而衰，三而竭」，凡事如果唔能夠「一口氣戰到底」，好多時都會衰收尾；好似「醫管局員工陣線」搞罷工、用病人福祉脅迫政府咁，開頭就話估計有9,000人參與罷工，之後就宣布有7,000人參與罷工，再到另一日，就得返唔夠5,000人罷工，到今日傍晚，佢哋嘅會員投票直頭有大多數投票會員支持復工，有「陣線」負責人「頓成淚人」。換句話說，罷工正式失敗收場，一場不得人心嘅罷工已經走向衰敗，綁架病人威脅政府呢一招行唔通，唔知余慧明同羅卓堯呢兩個罷工搞手，準備好辭職未呢？
人數少 呈敗象
喺罷工開頭，當「陣線」代表稱罷工醫護數目接近醫管局總人員數目約一成時，大家都覺得佢哋「係威係勢」，不過事實係大部分醫護依然堅守崗位，部分罷工醫護令初生嬰兒深切治療部、腫瘤科以至急症室都人手不足，令呢場打著「救人救港」嘅罷工行動，大大失去佢嘅所謂「正當性」，結果罷工人數越來越少，直到今日終於失敗收場！
咁「陣線」罷工失敗，仲有冇後續嘢「跟進」呢？好簡單，囍雨覺得「陣線」嘅一群核心代表，包括主席余慧明同副主席羅卓堯，應該辭職，為醫護罷工影響醫院服務而引咎辭職。其實，「陣線」副主席羅卓堯亦講過，對醫管局「冇晒希望」，話要「繼續罷工甚至集體辭職」，只係之後「陣線」主席余慧明就否認，話罷工前已經出現有人請辭。講真，一時話請辭，一時又話唔辭，仲想醫管局唔好秋後算帳，去到呢個地步，仲想縮沙？
「綁架者」要承擔「罪責」
囍雨相信，絕大部分有罷工嘅醫護人員都會回到工作崗位，或者有個別嘅醫護會繼續「擅離職守」，佢哋極可能會面臨處分；而余、羅二人，作為整場「綁架病人」行動嘅禍心，佢哋無可能唔被醫管局處分，因為今日俾佢哋搞事而「無後果」，他日只會出現更大嘅醫護危機！其實，當「陣線」近期不斷高調地強調醫管局唔可以對佢哋「秋後算帳」嘅時候，囍雨懷疑佢哋之前「堅持」罷工，有機會只係怕一「退落嚟」就會即刻被處分，所以先係咁逼醫管局唔好追究，但佢哋嘅最後一根「稻草」，明顯已經因為會員都投票贊成復工而掉失；呢個世界係公平嘅，既然「綁架」得香港嘅公立醫療體系同急需照顧嘅病人，唔理「綁架者」最後有冇「撕票」，想唔「承擔罪責」，真係好難喇！ ■
好文章