觸目驚心的「38%」

雖然文憑試歷史科嘅爭議考題已經被教育局宣佈取消，不過根據考評局官員披露，其實有38%嘅考生，對於《1900-45年間，日本為中國帶來的利多於弊》一問，竟然係認為「利多」。囍雨想講，一條事關國家尊嚴、歷史真相，大是大非嘅題目，喺香港會有接近四成嘅考生俾出咁嘅答案，呢「38%」可謂觸目驚心；香港教育崩壞到咩程度，由此可見一斑！

葉建源又拋「思想禁區」論

如果將考生答案深究落去，數字仲得人驚，因為仲有17%嘅考生「只提及利處」，另外有4.9%表示「冇立場」。對於呢種令人咋舌嘅「答案分類」結果，代表教育界嘅立法會議員葉建源唔單冇批評過，竟然仲得出另一種結論，認為由此「證明大部分考生並無被引導」，反而係教育局取消試題可能造成「思想禁區」，令教師日後「唔敢出題、唔知點教」。

囍雨請葉建源搞清楚，呢條試題，重點唔係在於有幾多人答「弊多於利」就變得「冇問題」，而係竟然仲會有咁多學生認為日本侵華係「利多」，更甚者，係呢條試題嘅問法、史料提供，本身就極有問題、有違專業道德！如果葉建源真係要繼續死撐，囍雨都好想借用今朝電台節目一位聽眾所講，大家認為喺日本，考試會唔會問學生：美國當年喺日本投放兩粒原子彈，最終結束二戰，係「利多於弊」？呢條題，不如請葉建源都回答下！

有失德教師 自然有暴動青年

嚟到呢一刻，囍雨冇辦法知道考生如何去演繹佢哋心目中嘅「利多於弊」，亦都唔知道評分員係用咩標準去評分（雖然題目已經取消），但不得不提出一個聯想，就係當屠殺中國人、姦淫擄掠等戰爭罪行，都有學生認為「利多」時，咁佢哋又會點睇過去一年發生喺香港街頭、暴徒種種打砸搶燒、殺人放火？會唔會又認為呢啲違法暴行係「利多於弊」呢？

囍雨想講，無論係日本侵華定係香港暴徒暴力（雖然兩者不能簡單類比），其實都已經超出單純嘅歷史問題、政治問題，而係關乎人性道德、是非觀念嘅問題，但歸根結底，大家應該問，點解仲會有認同「利多」嘅學生呢？囍雨唔係無端端提出呢個問題，大家不妨睇下，剛剛過去嘅星期日，因為喺銅鑼灣參與暴動、私了市民而被捕嘅，又有學生；當日190幾個被捕者當中，接近30人又係未成年人，究竟點解？！恕囍雨喺度直接講一句自己觀點——咪就係因為有一個接一個煽仇警、縱容暴力嘅失德教師囉！咪就係因為有不斷包庇呢啲失德教師嘅教協、「葉建源們」囉！

救救孩子們 救救下一代

講真，呢啲未成年人、學生、青少年，好多都係與香港特區「同歲」，或者成長於香港回歸之後，佢哋係咪愛國，係一回事，未必有得深究，但佢哋走上街頭犯法、甘做「衝衝子」、「火魔法師」，甚至以暴力手段搞暴動、搞「港獨」，就係必須深究嘅問題！究竟係咩人喺背後煽惑佢哋去「送死」？依家中央出手訂立「港區國安法」，講到明嚴厲打擊「港獨」、暴徒，但其中用心，何嘗唔係要保護我哋嘅學生、青年、下一代，再免成賣國賣港政客嘅炮灰 …… ■