攬炒派連反對票都唔敢投？

攬炒派做事，永遠都係「高深莫測」，你以為佢會喺議會盡佢哋嘅「反對」職責「投反對票」，竟然無喎！噚日，立法會三讀通過「國歌法」草案，囍雨本來估計之前喺《財政預算案》、第二輪防疫基金都投反對票嘅攬炒派會投反對票啦，但唔知點解，除咗「熱血公民」鄭松泰之外，佢哋竟然無投票。佢哋唔係成日話要反「惡法」嘅咩？連票都唔投，齋食人血饅頭，套用反政府人士一句話，呢班人對唔對得住「手足」呀？

攬炒派對不起「手足」？

對於攬炒派連票都唔投，有唔少人串佢哋係唔敢投，當中原因，囍雨大膽估計，佢哋可能係怕「港區國安法」訂立之後，反對「國歌法」嘅政客，會因為反國家舉動而被DQ（取消參選資格），所以呢，為咗保住自己嘅議席、「錢途」，呢班政客連反對票都唔敢投，佢哋嘅政治承擔，真係「大到」呢 …

另一個可能性，就係攬炒派一班議員，佢哋驚嘅唔止係被DQ咁簡單，而係怕若然「港區國安法」有追溯力，佢哋喺議會內外嘅種種反中央行為會被追究，所以向來「又要威又要戴頭盔」嘅佢哋，就更加唔會投票。對於佢哋有冇投票，係咪投反對票，其實囍雨唔係最關心，囍雨反而喺度諗，攬炒派喺議會外班「手足」喺街頭上「打餐死」，呢班政客「叫人衝，自己縮」都算啦，竟然喺議會內連票都唔敢票，對唔對得住一班「手足」先？唔好喺度「走精面」，諗住又要討好「手足」，又要喺議會玩「閃避球」喎！

港區國安法未出鞘 先見效

喺「國歌法」投票呢件事上面，大家除咗見到攬炒派嘅醜惡之外，仲應該會睇到一點，就係佢哋如果因為忌諱「港區國安法」連反對票都唔敢投，證明咗「港區國安法」有好大嘅震懾力；所以就算喺議會之外，連攬炒派元老李柱銘、違法佔領發起人戴耀廷等，都紛紛轉口風，唔係話反對「港獨」，就係話自己會「收聲」。由此可見，要「斬妖除魔」，「港區國安法」真係必不可少。囍雨喺度諗，如果「港區國安法」真係通過立法同實施，一班攬炒派仲可以做啲咩？繼續催俗立法會「35+」，然後喺議會「佛系抗爭」，「永續」立法會嘅高薪厚祿？諗到呢一點，囍雨真心替攬炒派嘅支持者感到痛心。■