罷工 攬炒 一齊「跳崖」

經濟差嘅時候，你會做啲咩？努力工作，保住份工？參加罷工，搏炒乞米？對於呢個問題，廣男深信只要稍有理性嘅人，都會知道答案係咩，不過，向來唔講道理甚至常理嘅攬炒派，竟然喺呢個時候投公投，話要發動罷工、罷課，廣男就覺得，攬炒派唔單止係想香港死，佢哋係想拉埋啲打工仔同佢哋一齊「跳崖」！

門檻自設的「公投」

講開攬炒派想搞「公投」，繼而發動罷工、罷課，廣男首先要提出一個問題。據傳媒報導，佢哋發起嘅公投，只要有六萬人投票、六成人贊成，主辦方就會發起罷工（罷課投票門檻為一萬人），全香港有380萬打工仔，6萬人投票，連2%都唔夠，咁就要搞全港罷工？係攬炒派隨便set到門檻，定係連佢哋自己都怕唔夠人支持佢哋，所以將個門檻set到咁低？

更重要嘅問題係，除咗做緊立法會議員、區議員嘅攬炒派政客，廣男唔知其他攬炒派做緊咩，或者係咪有咩金主撐住佢哋，呢個時勢叫啲打工仔罷工？即係叫啲打工仔喺未攬炒到政府之前，先攬炒咗自己？打工仔真係要小心，學生罷課，可能會俾人煽動到前線做「衝衝子」，隨時賠上一生前程；打工仔罷工，就可能隨時連份工都無埋，到時攬炒派唔會幫到你，真係喊都無用！

你唔想做 大把人做？

有朋友同廣男講，其實依家失業率咁高，如果真係有人罷工都唔係壞事，廣男問點解，朋友就話咁多人想搵工，如果啲人係要罷工、搞事，不如「劈炮唔撈」，將佢哋嘅工作比啲失業人士或者畢業生，咁就解決到好多問題啦！廣男再問，咁變咗失業嘅「黃絲」點算？朋友又答，依家英國、美國甚至台灣都話歡迎啲抗拒「港區國安法」嘅香港人，反問廣男又駛乜替佢哋「擔心」呢？朋友呢番說話，實在一言驚醒夢中人，廣男立刻心念一轉，覺得如果罷工人士將工作讓予失業人士，自己投入外國或台灣懷抱，都不失為好方法，分分鐘可以將失業、房屋問題都解決。

其實，經濟差、環境唔好，最好嘅方法就係諗下點搞好經濟民生，當有組織千方百計搵商戶提供優惠、刺激經濟嘅時候，攬炒派仲喺度諗點罷工，好似同個世界「脫節」、「堅離地」咁。廣男「期待」佢哋搞罷工，更期待罷工人士嘅老闆識做，「送佢哋一程」。 ■