戴耀廷又要攬炒又要縮？

攬炒派完成所謂「民主派初選」，雖然攬炒派聲稱初選有60萬人參與好「成功」，但係初選後出現咗一個奇怪現象，就係有份統籌、協調初選嘅前立法會議員區諾軒、東區區議員趙家賢都相繼宣布「退出」初選工作；更離奇嘅係，初選嘅主腦人物戴耀廷都突然宣布「收手」，稱「到了這階段，餘下需要做的已不多」、「過去幾個月的勞累，我希望在未來的一段日子，爭取多一些休息時間，也可以更專注於學術的工作」，囍雨又係果句，攬炒派唔係堅稱初選合法嘅咩，既然合法，做咩要縮？

攬炒派的矛盾

對於區諾軒、趙家賢同埋戴耀廷相繼宣布退出或者「半退出」，囍雨又係果句，攬炒派唔會係成日話初選合法咩，做咩要縮？如果因為外界質疑初選違法就要縮，咁做咩要做抗爭派？叫做抽水派咪算啦！

好老實講，如果初選犯法，區、趙、戴以至其他參與初選嘅人，明顯已經係「犯咗法」，唔會因為初選選舉完成「退出」而免責！喺呢度，囍雨想特別指出，戴耀廷同區諾軒、趙家賢唔同，因為戴耀廷係整個攬炒議會計劃嘅始作俑者、主腦級人馬，如果大家有睇過戴耀廷嘅《真攬炒十步 這是香港宿命》，都會知道初選、35+，其實最終就係要引發「激烈抗爭、血腥鎮壓」，最後就要同中央跳崖攬炒；喺呢個前提底下，如果戴耀廷真係有違法例如觸犯「港區國安法」，罪責一定唔會輕！

入監獄休息吧！

喺呢篇「暫別」感言，戴耀廷好強調自己要「休息」、「專注學術」，其實如果佢想休息，囍雨覺得有一個地方好適合俾戴耀廷休息，就係監獄。大家諗下，如果佢真係有一日要承擔反中亂港嘅罪責而入獄，咁佢喺監獄，可以「遠離煩囂」，又可以專注學術，大家話幾好呢？有啲人話，戴耀廷都係搞下初選啫，無傷大雅，唔需要認為佢係咩「重罪犯」，但囍雨又想指出，2013年佢提出違法佔領時，都係講講下，結果呢？結果就發生咗一場持續79日、百萬計港人受苦受困嘅動亂，今次所謂攬炒派35+，絕對係傷害香港行動嘅「加強版」，而且仲想逐步逐步推進、付諸實行，大家真係唔可以掉以輕心！■