喺所謂「民主派初選」，激進攬炒派可以話係「大獲全勝」，趾高氣揚嘅十幾位初選勝出者，就特意開咗個記者會「回應初選結果」，表明無論確認書加入《港區國安法》內容與否，佢哋都會義無反顧反對「港區國安法」，又稱會商榷係咪簽署確認書。喺呢段說話入面，大家睇到咩？廣男就睇到，佢哋為咗入閘，已經留咗條後路俾自己，隨時準備為入閘簽確認書喇！
確認書的內容有什麼？
如果聽激進攬炒派呢番話，廣男大致理解為佢哋勢必反對《港區國安法》，但又會諗諗簽唔簽確認書；對於確認書會唔會有關於《港區國安法》嘅內容，廣男暫時唔知，不過睇返2016年立法會選舉嘅確認書，參選人或者候選人要示明自己會擁護《基本法》同保證效忠香港特別行政區，當中包括擁護《基本法》中香港係中國不可分離部分、香港係高度自治而直轄於中央嘅地方行政區域等內容。一班激進派，尤其係曾經提倡「自決」、認為「港獨」係「自決」選項嘅本土抗爭派，簽呢個確認書，係咪認衰仔先？係咪為咗鋪路入立法會，就「未抗爭，先跪低」？
反國安法 = 反基本法？
至於反對《港區國安法》嘅問題，參選人或者候選人要擁護《基本法》，而《港區國安法》已經納入咗《基本法》附件三，一班激進攬炒派反對《港區國安法》，係咪等於無擁護到《基本法》呢？喺呢個情況之下，廣男都好想知道，一班擺明反對包含《港區國安法》嘅《基本法》嘅政客，係咪仲可以入到閘？尤其甚者，一班抗爭派表明入到立法會會用攬炒立法會嘅手段脅逼政府，本身又有冇違反《港區國安法》，又係一大問題！
最後一點，廣男想指出，如果呢班人本身有「港獨」、自決傾向，其實法理上不容易俾佢哋入閘，無論黃之鋒等人講乜嘢呼籲中央「懸崖勒馬」都好，對唔住，改變唔到立法會選舉有法例可依嘅事實。拒絕擁護《基本法》、效忠特區，仲點解要俾你哋選立會、玩攬炒呢？ ■
Be the first to comment