近年，攬炒派搞事越搞越過分，去外國要求外國制裁香港，喺香港又縱容黑暴，想攬炒議會；噚日，各區選舉主任決定DQ（撤銷參選資格）12名攬炒派政客，當中包括公民黨楊岳橋、郭家麒、鄭達鴻同郭榮鏗，公民黨就召開記者會「扮苦主」，其中公民黨主席梁家席更稱今次DQ係「欲加之罪，何患無辭」。囍雨質疑，公民黨四子被DQ係「欲加之罪」，定事實係根本「有人犯罪」呢？
看看公民黨幹什麼
喺呢度，囍雨真係要同大家recap一下公民黨到底做過乜！例如去年九月，公民黨幾名議員就用公民黨信箋去信美國幾名參眾兩院議員，懇請對方「誠摯地懇求閣下及閣下的同僚們盡快通過（香港人權與民主）法案」，簡單嚟講，即係叫美國快啲制裁香港，呢啲事實，係欲加之罪？
幾個月前，包括楊岳橋在內嘅公民黨政客，仲有一日突然「好有霸氣」咁召開記者會，其中楊岳橋公開聲言「一旦民主派達到議席過半，公民黨會否決所有政府法案、撥款申請，如果林鄭不回應五大訴求，她需要解散立法會、甚至下台」，即係唔理政府法案、撥款內容，只要政府「唔回應」所謂嘅五大訴求，公民黨就會否決晒法案、財政撥款嚟要脅政府，擺明要癱瘓議會同政府。直到最近，抗爭派一班政客搞抗爭立場聲明書，公民黨亦有加入聯署，聲明內容「包括否決財政預算案，迫使特首回應五大訴求」。囍雨想問下，公民黨呢啲行為，有可能令選舉主任信納佢哋會擁護《基本法》、效忠特區咩？
他們擁護的 只是反政府行動
從以上內容，唔好話選舉主任，就算係一般人，都好容易總結到，一班要求外國制裁香港、要否決政府法案同財政預算案嘅政客，根本就唔可能係擁護《基本法》、效忠特區。值得留意嘅係，其實選舉主任向公民黨嘅政客作出提問，佢哋其實係有機會作出申辯，不過，楊岳橋等人仲喺度玩文字遊戲，稱自己只係倡議適當地行使《基本法》賦予嘅憲制權力，今日佢哋俾人DQ，囍雨只能送「咎由自取」四個字俾佢哋。其實，監察政府、批評政府無問題，但如果一早立心係要外國搞香港、入議會癱瘓議會，咁仲俾佢哋參選，撇除《基本法》等法律問題，好明顯係唔合理！ ■
Be the first to comment