「你愛就要講啦！做咩唔出聲啫？」呢句經典嘅電影對白，相信套用喺今日攬炒派政客身上就最啱用，明明係好想「留任」、做多一年立法會議員，偏偏就係唔出聲，死都唔講清講楚；最新消息，就係一向同主流攬炒派議員「行唔埋」嘅熱血公民立法會議員鄭松泰，率先表態支持「延任」。相比起鄭松泰，其他議員連表態都唔敢，講真，廣男覺得好肉酸囉！
鄭松泰都表態了
綜觀鄭松泰嘅恴思，佢就係質疑總辭效果，如果要總辭，就應該喺DQ時就總辭；如果反對派杯葛日後所有選舉，熱血公民會參與，否則「延任就延任囉！」老實講，如果你問廣男，廣男當然都係唔喜歡鄭松泰一向嘅所作所為，不過，今次起碼鄭松泰至少無龜縮，肯表態，其他攬炒派議員，其實依家等緊乜呢？
直至現時，其實社會仲有聲音叫攬炒派總辭，不過恕廣男坦白講句，唔好晒氣啦，攬炒派議員其實根本唔想辭，涂謹申日前話「暫時聽到希望全部留低的人，反對派議員全部留低聲音多少少」，然後梁家傑又話以個人身份傾向民主派「上車」，廣男覺得除非有突變，否則攬炒派議員只係等緊一個「華麗轉身」嘅機會，然後就會宣布接受「延任」。希望攬炒派總辭嘅人，廣男唔可以話佢哋天真，只係佢哋太唔了解攬炒派議員。
延任以後 會是如何？
攬炒派議員因為金錢、議席、名譽、地位嘅考量也好，廣男覺得佢哋想「延任」好正常，廣男反而關心，如果佢哋真係「延任」，喺之後嘅議會工作，佢哋係咪仲諗住要攬炒呢？如果係，咁就算俾佢地做多年，但佢哋言行不符要擁護《基本法》、效忠特區嘅規定，佢哋下次其實都可能無得選。
所以呢，想繼續走議會路線，無問題，但既然要喺體制之內，就請攬炒派唔好再玩攬炒，唔好選個委員會正、副主席拖半年，亦都唔好下下玩「拉布」；唔好忘記，你哋當中有啲人，仲供緊樓、要養家的；萬一因為無咗議會份工而無錢供樓，你哋話幾「慘慘豬」呢？■
Be the first to comment