因為要決定係咪「延任」立法會議員至少一年，整個攬炒派頓時分裂成兩個陣營，以民主黨為代表嘅老一派，傾向「留任」，表示要「守住議會」；而傾向本土、激進嘅新一派，就傾向「離任」，誓不接受中央再委任。近日，人民力量立法會議員陳志全向同事表明辦事處喺今個月30日「結束服務」，即表示唔會「延任」，而同屬本土派嘅立法會議員朱凱廸，就聲稱同陳志全「共同進退，杯葛臨時立法會委任」。睇到攬炒派內部「分道揚鑣」，呢班政客係咪開始咗「內戰」呢？
本土派必定離開議會？
對於陳志全以至朱凱廸係咪一定會離任，廣男就覺得大家可以睇定啲先，因為喺陳志全嘅公開言論，佢自己都有講明「如果所有民主派議員都事前承諾接受民調結果的約束，我才會考慮」、「如果所有人跟，我也會跟。但現在看來機會非常渺茫，我要對辦事處的同事負責，盡早作善後安排」等等；而朱凱廸亦曾經講過可以做民調或公投作決定。表面上，佢哋去意已決，但仲有冇變化呢？廣男就唔敢講喇。
老實講，如果陳志全同朱凱廸基於自己嘅政治原則而決定唔留任，廣男就算唔同意，至少都仲會覺得佢哋起碼有自己嘅原則；相反，民主黨一班政客明明就係想留低，但又喺度「扭計」，一時質疑民調唔可以做政治判斷，一時又話另外再做民調，一時見到民調結果唔啱自己就話係「參考」，總之醜態百出。相比之下，起碼今次一班本土派立場清晰得多先。
辦事處月尾結束 議員還不行動
睇到陳志全俾同事嘅公開信同公開言論嘅一啲內容，廣男就睇到一個問題，正常要結束地區辦事處、租約，應該都有一個月時間通知等等，民主黨9月尾先做民調，如果到時結果同樣係多數或過半受訪者反對攬炒派議員延任，咁剩返幾日時間，佢哋點處理辦事處結束同員工遣散呢？定係民主黨已經胸有成竹，知道民調會如自己所願，或者個民調門檻根本係「無得輸」？
「無論如何」，因為今次延任問題，可以見到攬炒派內部根本就不可能「齊上齊落」，而所謂民主大黨，最重視嘅亦唔係支持者嘅意見，而係議席，講白啲，係薪津，係錢！靠呢班人喺議會抗爭？Sorry，佢哋只係「打工仔」，唔好諗太多！ ■
Be the first to comment