關於東區法院何俊堯裁判官嘅調遷問題，近日引發建制派同攬炒派嘅互相批評，公民黨立法會議員譚文豪稱有關批評干涉司法獨立，建制派則有議員去信投訴何俊堯，指佢不時發表偏頗並帶有政治傾向嘅言論，甚至係處理案件不公。對於呢啲爭拗，囍雨首先要問一句，法官判案，如果市民或者社會人士係有理有據，係咪都唔可以提出質疑？司法獨立，但市民又有冇權監督？
先看看何俊堯的言行
喺討論何俊堯嘅問題前，囍雨覺得大家可以先睇下有關議員投訴佢嘅個案內容，當中包括《香港眾志》三名成員喺舊年《國歌法》公聽會內抗議，被裁定未有遵守秩序，最後被判罰款，何官仲指三人係未來「社會棟樑」，叫佢哋應留「有用之軀」；去年一名聽障婦涉推警員肩膀而被控襲警，何官質疑其或未明警員解釋，准簽保守行為；另一單涉及暴力嘅案件係有人向警方防線掟嘢，何官指被告行為「不算太暴力」，判社會服務令；再有一單有中四男生向警察宿舍掟汽油彈，被告承認縱火罪，何官表示「唯一受傷可能係被告被制服嘅時候」等等。睇到呢啲案件，大家有咩感覺？
先唔講係判得重定判得輕嘅問題，幾個被告犯罪，裁判官讚佢哋係未來「社會棟樑」；有人向警方掟嘢，裁判官話唔算好暴力；有人掟汽油彈，裁判官就話「唯一受傷可能係被告被制服嘅時候」，對於呢啲言行，有議員以至市民質疑，係咪合理呢？觀乎呢啲言行，平常人都可能會覺得何俊堯嘅言行已經超出咗同情被告嘅範圍，甚至可能係偏頗。喺呢啲基礎下，囍雨覺得公眾提出意見未嘗不可，只要合情合理、無人身攻擊就可以。
若是被指偏袒建制派結果會如何？
嚟個換位思考，如果係有裁判官被指偏袒建制派或其支持者，囍雨恐怕攬炒派人士對法官會更加「唔客氣」，甚至又會玩起底；今次何俊堯引發社會爭議，有人認為司法獨立重於一切，其他人唔應該出聲，囍雨就覺得，如果單憑司法獨立四字就將所有意見排除，反而對司法界未必係好事。裁判官、法官判案，所依憑嘅係法律、理據，其他市民去評價、判斷一個裁判官或者一宗案件時，一樣可以基於法理以至常理，何俊堯受盡質疑，囍雨只想講句，事出有因嘅。■
Be the first to comment