「12瞞逃」先喺香港涉嫌犯案，繼而想潛逃台灣，喺內地水域被廣東海警截獲，其實呢件案，係明明白白嘅「棄保潛逃偷渡案」，不過，攬炒派以至外部勢力，偏偏就話要「救人」、內地部門「放人」，今日廣男睇新聞，仲話由今日開始全球超過20個城市會發起遊行同網上集會，聲援「12瞞逃」，美國更有參議員話同情12人遭遇，強調美方與港人同行云云。其實，咁多人表示要「聲援」疑犯、逃犯，成件事係咪有啲失智呢？
Again 他們是逃犯
對於有人要喺咁多地方搞行動聲援「12瞞逃」，廣男覺得喺度都係要溫馨提示下大家，「12瞞逃」唔係咩受害者，而係一個個「重罪犯」，佢哋當中有人涉嫌違反《港區國安法》，有人涉及暴動，有人涉及無牌管有槍械及彈藥罪，亦有人涉及爆炸品案同縱火案，喺呢個前提底下，佢哋潛逃、偷渡而被捕，外國或外部勢力「聲援」佢哋什麼呢？
「12瞞逃」被內地海警截獲，涉嫌觸犯偷渡相關嘅罪行，攬炒派以至外部勢力要「聲援」佢哋，客觀效果就係要內地部門放生喺內地海域涉嫌違法嘅人，套用返攬炒派嘅說法，呢啲算唔算係違反法治精神？再者，如果因為有政治勢力撐佢哋，內地部門就要放人，咁以後內地政府點實行管治？個個反政府人士都要放，咁中國以至香港，會唔會有更多人犯罪？將心比己，美國好，英國好，加拿大也好，相信佢哋都唔會希望外國干預佢哋內政，既然己所不欲，又何必將自己意志強加於人呢？
打擊中國的動作
其實講到底，咁多國家、地區有人搞「聲援」「12瞞逃」，又係借香港打擊中國嘅動作；如果真係咁關心「被扣押」嘅人，廣男想問下，之前有五個黑暴人士潛逃到台灣，俾台灣當局扣押，據報除咗無得見律師、無得通知家人外，外界連佢哋姓名同被扣押喺邊都唔知喎，不如攬炒派搞下集會聲援下喺台灣被扣嘅「手足」？以上兩件事，反映咗攬炒派以至外部勢力嘅一個「通病」，就係永遠都雙重標準，只會認定「凡是中國的，就是不對」。 ■
Be the first to comment