攬炒派才是冷血？

台灣殺人案疑犯陳同佳到今日都未可以去台灣投案，當中原因，就係台灣當局唔俾陳同佳搞簽證去台灣，喺呢個情況底下，「路人甲」都睇得出台灣嘅民進黨消費完陳同佳事件，依家都唔想彰顯公義。日前，行政會議成員、資深大律師湯家驊指受害人親母（潘母）奇怪，因為對方竟然唔怪台方怪警方，話當局唯一辦法係叫民主派將陳同佳扮成「棄保暴徒」偷渡到台灣，點知就俾違法佔領發起人陳健民話佢「冷血」、喺「12瞞逃」嘅家人傷口上灑鹽。其實，攬炒派見到台灣「不作為」、陳同佳「投案無門」都敢唔批評台灣一聲，潘母依家百般折騰，到底邊個係冷血呢？

關於陳同佳案的事實

對於陳同佳涉嫌喺台灣殺人案，案發地點係台灣，發出通緝令嘅係台灣，話自己會「辦」呢件案嘅亦都係台灣；依家陳同佳想赴台自首或投案，點解台灣竟然會唔俾，而一定要港府同台灣進行司法互助呢？呢啲問題，攬炒派政客係咪完全睇唔到？

所以對於陳健民話湯家驊「冷血」，廣男想講，包括陳健民在內嘅攬炒派，先至係真正「冷血」，台灣當局嘅做法，係令到殺人疑犯唔能夠得到審訊、公義未能彰顯，點解陳健民唔批評下台灣嘅政府？而作為學者，廣男相信陳健民會理解到，陳同佳喺香港依家係「無罪之身」，台灣唔肯收人，如果唔係好似湯家驊嘅「說法」，陳同佳可以點去台灣？湯家驊的確係無講錯。

何不關注在台被扣港人？

至於陳健民話湯家驊喺「12瞞逃」家人傷口灑鹽嘅說法，話人「涼薄」云云，其實陳健民會唔會過於「玻璃心」呢？如果講灑鹽，不如話陳健民評論事件又唔批評台灣，係喺潘母傷口上灑鹽？更重要嘅係，陳健民既然咁關心「12瞞逃」，依家就有五名港人偷渡台灣而被扣押，外界到依家都唔知佢哋被扣喺邊，甚至姓名都唔知，陳健民係咪都可以關心下喺台灣嘅「手足」？廣男睇完相關新聞，只有一個感覺，就係凡係建制派嘅都「不對」；台灣嘅政府呢？陳健民呢啲攬炒派政客，完全默不吭聲。 ■