大家有冇諗過，一個人放棄履行佢嘅職責，遠走高飛，居然仲可以話老闆「唔出糧」俾佢？當然係可以，主角就係身負「三案九罪」、走咗佬去英國嘅前立法會議員、中西區區議員許智峯。近日政府表示停止向佢發放薪津，許智峯就喺社交平台回應事件，稱呢個係「政治打壓凌駕法律及程序」，停止發放酬津完全沒有法律基礎。其實，一個打工仔好，議員也好，人都走咗，仲想出糧，佢係連常識都無？發窮惡？定係可以無恥到為咗錢乜都講得出口？
「理直氣壯」的走佬派
對於許智峯嘅回應，囍雨係覺得好「出奇」，因為普通人都會覺得，人已潛逃，根本仲要「出糧」俾佢係於理不合，不過佢就好似「扮無事」咁，稱「在議員仍在任時，停止發放酬津亦嚴重影響議員辦事處服務市民，對政權做法不顧市民利益感到遺憾」、「我的區議員辦事處從未停止運作，至今仍開放繼續服務市民」。許智峯咁強調佢嘅「議辦」服務緊街坊，其實另一個意思，就係佢本人唔可以喺地區服務街坊囉！咁仲出咩糧？
當政府、執法部門對攬炒派政客有咩行動，攬炒派例牌就話係「政治打壓」，喺呢度，囍雨想問下許智峯，你人唔喺香港，你點履行職責？你可唔可以接見街坊？可唔可以落區？可唔可以面對面開會？可唔可以做街站？可唔可以約見官員？叫啲人去英國搵你呀？連履職都做唔到，仲想要人工？如果特區政府仲發薪津俾許智峯，真係荒天下之大謬。
回港追討吧！
囍雨唔知道許智峯係咪好等錢用，如果係，又想政府繼續出糧俾佢，好簡單啫，返嚟香港囉，你未被DQ，返到嚟都仲可能係議員；但如果你唔返嚟，又唔知幾時返到嚟，咁政府仲出糧俾你，即係浪費公帑，呢樣嘢唔單止政府唔容許，市民都唔會俾政府咁做！老實講，一個逃犯，竟然講嘢可以如此「理直氣壯」，真係令人汗顏。
最後，關於許智峯嘅事，囍雨覺得有三個問題大家必須記住，第一就係佢身負「三案九罪」，係逃犯！第二，佢之前眾籌打官司，包括疑用成110萬請「自己友」律師，要再交代！第三，佢已經涉嫌觸犯《港區國安法》，請回港投案！■
Be the first to comment