新冠疫情肆虐香港一年幾，本地經濟一直麻麻，失業率持續高企。整體市道差，要搵工唔容易，就算係學歷較好嘅畢業生，一樣面對失業問題。教資會之前做調查，1.9萬名受訪嘅全日制學士畢業生之中，有434人失業，比率係2.9%，創近11年新高。更值得留意嘅係，「八大」院校之中，中大畢業生嘅失業率竟然高達5.7%，成為眾院校之冠。到底點解會咁？係咪因為中大嘅「暴大」形象太過深入民心，所以連僱主都怕晒，對招聘中大畢業生有戒心？
中大被佔領 校園一片狼藉
囍雨都仲記得，前年11月中，中大校園畀大批暴徒佔領，仲同警方展開對峙。當時暴力示威者將校園變成「兵工廠」，喺校內搜刮物資、整汽油彈、掘磚頭做武器等，仲「接管」埋校內食堂、校巴，行為猖獗至極；暴徒其後仲放火燒車做路障，不停向警員掟汽油彈、磚頭等，完全係想攞警員命咁。呢類場面足足持續咗三日，由朝早打到晚，而當佔領事件落幕，校園變得一片狼藉，唔單止有大量設施被毀，警方更喺校內仲搜出約3,900枚以上嘅汽油彈，中大仲有近100公升危險化學品被人偷走。成件事只能用四個字去形容，無天無天！
中大慘遭暴力示威者蹂躪，市民大眾都覺得憤怒同心痛，但係中大學生同多個書院學生會，竟然將件事美化成「中大保衛戰」，講到好似真係打仗咁。明明佔領者自己帶頭破壞校園，為逃避刑責，抗拒警方執法，咁又點會係「保衛」呢？身為大學生，連根本是非黑白都未分得清，價值觀又扭曲到咁，呢一切僱主看在眼裡，對中大生有戒心，其實又真係唔出奇。
吳傲雪的謊話 大家清楚記住
仲有仲有，前年仲係中大學生嘅吳傲雪，同校長段崇智嘅一段對話，相信好多人都記得。當晚吳傲雪喺傳媒面前除低口罩，高調聲稱自己遭警員「性暴力對待」。嘩！嗰陣即起引起社會哄動，唔少香港人真係以為佢真係「新屋嶺受害人」，點知原來都係假嘅！吳傲雪第二日就澄清，話自己根本無去過新屋嶺；警方事後想搵佢協助調查，都選擇避而不見。老實講，當社會大眾對呢啲畫面都仲係歷歷在目，僱主們會對中大畢業生有「特殊感受」都好正常啊。
不過公道啲講，囍雨都覺得，政見立場、言行偏激嘅中大生，其實只係佔好少好少數，相信大部分中大生都係能夠明辨是非。囍雨都希望僱主們唔好一刀切去負面標籤中大學生，畢竟暴徒始終都係社會嘅少數，除非有好確切證據證明應徵者曾經參加暴動，否則都盡量畀機會班中大畢業生啦，始終年輕人可以融入社會，先有機會變得成熟，唔會再滿腦子暴力同衝動。少一個激進年輕人，對香港始終係好事吖。■
Be the first to comment