近月香港鬧出口罩荒，「香港眾志」就「食住條水」，喺社交網站宣布由美國採購到十萬個「中國製造」嘅口罩，會喺佢哋嗰網店到畀人搶購，點知「眾志」一時話自己承擔運費，之後宣布賣同一款口罩有「三種價錢」，最貴嗰款係講明要籌錢畀「醫管局員工陣線」成立嘅基金，消息一出網上群情洶湧，惹來罵聲一片，最終「眾志」取消計劃，統一賣最平（唔洗買家捐款同俾運費）嗰款。計廣男話，「眾志」擺明就係想借機籌款畀之前搞罷工嘅「醫管局員工陣線」，但係見畀人狂鬧，勢色唔對就即刻縮沙！
口罩定價「三級制」
雖然「眾志」依家已經刪左有關口罩定價「三級制」嘅帖文，但係聰明嘅網民一早截圖「留底」，根據「眾志」本來定價，同一款口罩分別賣98元、128元同258元，最平嗰款係聲稱由「眾志」補貼運費，中價就係買家自已出運費，最貴嗰款就係包埋捐款，想買邊款就由買家決定。既然「眾志」都開宗名義要籌錢，不如大大方方搞募捐，但係又要用賣口罩去做「煙幕」，咁點會唔引起公憤？
「眾志」仇中 賣中國製口罩
廣男一開始仲以為，「眾志」賣口罩，係想為「抗疫」出一分力，點知到頭來原來又係一場政治行動，佢哋仲想借機幫支援參與醫護罷工嘅基金籌款，但係一場醫護罷工，就搞到公立醫院服務被癱瘓多日，仲有病人懷疑因為人手不足、出意外而失救致死，「眾志」仲想叫人捐錢畀佢哋？更搞笑嘅係，一向仇中反中嘅「眾志」，竟然都要賣中國製造嘅口罩？咁咪正正講咗一點，內地同香港關係密不可分，好多物資都係靠內地輸入，就算「眾志」幾「反中」都好，最後咪都係要用中國貨！
對於「眾志」聲稱「補貼運費」賣口罩，係咪真係事實、係咪想做「善事」，廣男就唔多作評論啦，留返畀大家自行判斷，但係廣男突然諗起，成件事好似「熟口熟面」，十足「眾志」推銷《香港人權民主法案》嘅翻版，又係先搞場「大龍鳳」再叫大家捐錢一樣，講到底，都係錢同政治！ ■
Be the first to comment