一班黑暴分子，好似電影橋段入面嘅主角咁坐船「著草」去台灣，可惜佢哋未到台灣，就被中國海警截獲、拘捕，而喺被捕人士當中，竟然包括涉違《港區國安法》、同《壹傳媒》黎智英同日被捕嘅《香港故事》成員李宇軒，亦包括灣仔汽油彈案被告同埋華仁書院炸彈案等疑犯。真係估唔到，一班成日話要「反送中」嘅人，如今「自動送中」，所以話呢，天網恢恢，但往往疏而不漏！
12名疑犯「落網」
據報，被拘捕嘅11男1女，全部都係有案在身，既有涉嫌暴動嘅港大學生﹐亦有涉嫌企圖縱火嘅中學生，更有消息指，被捕者中有四人係「屠龍小隊」成員。呢班人乘坐由本港黑幫安排嘅快艇，打算偷渡到台灣後申請政治庇護，但佢哋喺果洲群島對開內地水域被截獲，成為首度有黑暴人士喺深圳被扣查，案件將會喺內地法院審理。簡單而言，就係一班黑暴甚至「港獨」分子「自動送中」。
老實講，呢班「有案在身」嘅人，擺到明就係想逃避罪責所以先「著草」去台灣，不過，佢哋依家好明顯係錯晒喇！因為根據內地刑法，公安局可以刑事責任對偷渡者立案追責，判處一年以下有期徒刑，之後先再遣返香港；即係呢班人可能先會喺內地坐監坐一段時間，再遣返香港受審，囍雨就覺得，佢哋絕對係自己攞嚟。
自去年中《逃犯條例》修訂風波開始，攬炒派就抹黑條例修訂係「送中」條例，點都唔可以俾修訂通過，但依家一班打住「反送中」旗幟嘅人「自動送中」，實在相當諷刺。囍雨就認為，如果一班人涉嫌犯案，以為自己走去台灣就無事，實在太天真。第一，能唔能夠去到台灣，未知；第二，去到台灣係咪真係有人接收自己，都係未知。萬一失敗，即係好似今次咁，仲要面臨雙重罪責，囍雨真心想知道，到底係邊個教佢哋咁做，搞到佢哋要「先送中」，再返香港受審呢？
黑暴害人 影響一生
其實，事件嘅本質，就係一班年輕人因為攬炒派政客、媒體唆擺而走上違法黑暴之路，一步錯，之後就「步步皆錯」；講到呢度，大家真係要記得繼續譴責戴耀廷、梁家傑同楊岳橋呢啲「煽暴」政客，佢哋就「高高在上」、盡享政治光環及紅利，其他人就要「孭住罪責」著草，甚至入獄。囍雨又係果句，黑暴害人，影響一生！■
Be the first to comment