反對派鬥快割席？

去年立法會選舉雖然因為疫情延期，但一啲反對派政客嘅宣傳品，就令人非常「印象深刻」，例如民主黨前主席胡志偉，當時就有份「好型」嘅宣傳品，宣傳相片入面嘅佢，正喺衝突現場「手指指」，據報佢當時係大叫「我要見指揮官」，而宣傳品右下角，則用顏色鮮明嘅字寫上「逆權之戰 退無死所」，好一副「不畏懼，不退縮」嘅樣子。不過，近日傳出民陣可能會被取締之後，連一向堅實地支持民陣嘅民主黨都宣布退出民陣工作，齊上齊落？退無死所？鬥快割席咋！

教協當初為何加入？

據傳媒報導，民主黨中委、該黨會議代表陳堡明表示，喺風險越來越高下，退出民陣係「迫於無奈」。事實上，近日多個組織包括街工、公民黨、民協、新民主同盟以至教協等都跳船「離開」民陣，就連民陣副召集人、中西區區議員葉錦龍亦已經退出民陣；如果你問囍雨，民陣基本上已經係一個得返個殼嘅組織，就算繼續「存活」落去，都做唔到啲乜。

喺眾多退出民陣嘅組織中，囍雨覺得教協係最值得關注。一個教師工會，點解會加入亂搞遊行集會、事事「反中亂港」嘅民陣呢？當中有冇「古怪」，真係值得追查。但無論教協與民陣之間有冇「古怪」，大家都可以從中睇到一件事，教協作為教師工會，加入政治組織，加埋教協立法會前議員葉建源一向嘅行為，其實教協都係一個不折不扣嘅政治組織。

值得留意嘅係，當不斷有反對派組織同民陣割席，支聯會同職工盟至今無退出民陣，身兼支聯會主席和職工盟秘書長嘅李卓人並無割席，佢指民陣一直以和平理性方式舉辦遊行，深信民陣無違反《港區國安法》；用另一角度睇，李卓人嘅講法，係咪摑咗同路人一巴掌？即係啲同路人「縮」得無道理呢？

民陣無註冊社團

對於民陣有冇違反《國安法》，有冇收到外國資金（民陣堅稱無），呢啲可能真係要執法部門查過先知，但有一樣嘢囍雨可以肯定嘅，就係民陣根本唔係註冊社團，呢樣嘢連民陣召集人陳皓桓自己都承認，民陣只係一個「聯盟」並非「組織」；一個組織「屹立」香港多年，原來係「無牌」，警方係咪要做嘢？而民陣以往甚至到現在所針對嘅都係中央，又有冇觸犯咩法例？囍雨相信好快會揭曉。■