港大校委會今日 (26日) 開會，今次係新任校委會主席李國章上任後首個會議，嗰一班罷緊課既疑似學生（事事政治為先，唔知係唔係真學生）尋日就揚言，有同學認為罷課唔夠「激」，建議衝擊校委會，佢哋冇計劃阻止喎。嗰個講到明支持港獨既代表王俊杰仲話，「希望校委會盡量唔好刺激學生情緒」！吓？而家係你班人恐嚇會暴力禁錮、圍堵同衝擊，家陣仲叫人唔好刺激你？Are you kidding me？
講真吖，涉及港大校委會既風風雨雨已經持續多月，罷課學生由始至終都針對李國章本人，一時話佢係「教育沙皇」、一時又鬧佢「惡名昭彰」，但始終講唔出以李國章既履歷，到底有邊忽唔適合做校委會主席！
李國章喺醫學界地位崇高，係國際知名既外科醫生同教授，先後做過中大醫學院院長同大學校長，之後獲政府招攬做教育統籌局局長。李教授桃李滿天下，教出嚟既名醫不知凡幾，任中大校長期間，從來冇人話佢損害學術自由同院校自主（唔係吹水，記得2000年發生既港大民調風波嗎？當時李國章就直言：「邊個敢畀壓力中文大學？」）。
罷課學生憑乜嘢話佢唔合格？
不過，對住橫蠻既人，有時道理係永遠講唔清既。剩係睇港大罷課委員會既成員背景同質素，已經知道講道理係多餘既；委員會有乜人？「走數」、反口覆舌、暴力示威衝擊、出賣同伴、「推人去死既」兼而有之，往績咁特出，一睇就知冇道理可言！
數一數罷委會有乜人先：好似「走數天后」之稱既港大學生會前會長梁麗幗，前年係威係勢發動「雨傘暴動」，事後反口拒自首、拒被捕，理由係要去考試！嘩，「多麼充分的理由啊」！
另一罷委會成員、學聯前秘書長周永康，「雨傘暴動」後拒絕俯首認罪，完美演繹「公民抗命得把口，既畏且懼即刻走」，而佢喺暴動期間，更曾經鼓勵示威者去衝擊政府總部，點知自己轉頭就立刻匿入立法會大樓避難，棄示威者同戰友於不顧，呢啲人咁可恥，點可能會講道理先？
總而言之，奉勸班「港大學生」冷靜少少，和平示威可以，衝擊禁錮就咪制喇，社會唔會認同你班人既暴行，一意孤行，只會好似「雨傘暴動」咁，受盡萬民唾棄架咋！■
原文轉載自《港人講地》2016年1月26日
Be the first to comment