喺日前嘅中上環流血衝突，警方共拘捕咗49人，當中44人會被控暴動罪，囍雨今日喺網上見到一篇據報係喺拘捕行動中、帶隊去兩個被捕者屋企搜屋嘅警員心聲；呢位警員去被捕者屋企搜屋嘅時候，被捕者母親聲淚俱下同警員表示抱歉，其父親就直言子女被利用咗都唔知，仲話唔能夠將件事講俾被捕青年年屆八十嘅阿嫲知道，搞到被捕者喊起上嚟，果位警員都差啲忍唔住。其實被觸動嘅，絕對唔止呢位警員，其他香港市民見到有年輕人被捕、被告而可能前程盡毁，一樣感到心痛！
孩子 你令我好痛心
話說呢位警員去搜屋嘅時候，開頭仲以為被捕者嘅父母會盲撐被告，點知去到其中一個家庭，被捕者母親聲激俱下，同警員講「唔好意思阿Sir，辛苦晒」，仲同被捕者講「你令我好痛心，你知唔知自己咩前途都無晒」；至於被捕者嘅父親，除咗對警員表示支持之外，仲同被捕者講「你被人利用你知唔知」；搜完屋之後，被捕者問父親阿嫲知唔知佢被捕，佢父親就回應，「你阿嫲80歳啦，梗係唔可以俾佢知」，呢一刻被捕者開始喊，連果位帶隊嘅警員，都差啲忍唔住。
其實，對於年輕人被捕，除咗佢哋嘅父母傷心，警員都感到痛心之外，其他香港市民包括囍雨，一樣心痛；明明係一個又一個有大好前途、美好將來嘅後生仔女，但就因為出嚟示威、抗爭甚至涉嫌犯下嚴重罪行，一時之間由「天堂」跌落「地獄」，自己面臨刑責，家人心理亦受盡煎熬，講真果句，何苦呢？
政客請停止煽動
今日新聞報道話44人被告暴動罪，即係有40幾個家庭面臨相同困境，既傷心、又絕望；講到呢度，囍雨要問下果啲一直鼓動班年輕人出嚟抗爭嘅政客、媒體，依家一班後生仔俾人拉、俾人告喇，你哋仲覺得自己無問題？你哋對於不斷煽動年輕人嘅言行，有冇後悔？你哋係咪仲要繼續煽動啲年輕人，等更多年輕人被捕、被控告？倘若你哋還有一念之仁，就應該收手！
誠如上述嘅帶隊警員所言，呢一場係社會病毒，依家最重要係以平常心拯救未被煽惑嘅人；為着社會正確價值觀，大家不能退、不能避，必須守護好法治嘅最後一條底線，亦要守護社會道德的最後一道防線。■
Be the first to comment