經過「僅止一次」嘅和理非遊行、集會後，反政府暴徒再次原形畢露，喺剛過去嘅週末將暴力全面升級，直接向警察掟汽油彈，好似想謀殺咁款，又連平民、商舖都唔放過；噚晚就有幾名警員俾暴徒「追住嚟打」，有警員向天鳴槍示警，亦有警員擎槍阻嚇暴徒，本來生命受威脅，鳴槍、舉槍都係情理之內，但囍雨由噚晚到今日睇新聞，外界都似乎只關心「點解警察要舉槍」，而好似無乜人講啲暴徒用極度暴力逼使警方舉槍，呢啲係咩道理？如果警員生命受威脅都唔可以舉槍，咁係咪要任由自己以及同袍俾暴徒暴打先得？
警員生命受威脅
當外界尤其是個別政客、媒體不斷質疑警方鳴槍、擎槍，甚至以警員「情緒失控」嚟形容有關警員嘅時候，囍雨首先要問一句，有關警員點解要咁做先？睇返相關新聞同片段，有警車先被暴徒包圍，用鐵枝、竹枝狂打車身，警員落車追捕暴徒，被過百暴徒夾擊、追打，甚至有暴徒用長鐵通等武器襲擊防暴裝備唔多嘅警員，警員生命明顯受到威脅，於是就拔槍向天鳴槍示警，阻嚇暴徒。見到呢個過程，大家係咪仲覺得，暴徒襲警有理，而警員就唔可以拔槍阻嚇暴徒先？
老實講，囍雨覺得涉事警員已經相當克制，因為喺明顯被包圍、群毆甚至追打嘅情況下，警員雖然生命安全受到威脅，但警員係無向任何暴徒開槍，而係向天鳴槍，以及用槍阻嚇暴徒再施襲；警員嘅警槍，當然係唔可以隨便使用，但係當面對以百計嘅暴徒，而自己手上除咗配槍就只有盾牌同警棍，大家係咪覺得十個八個警員可以憑簡單裝備，就「擊退」暴徒呢？囍雨就覺得無乜可能喇！
本末倒置的質疑
囍雨認為政客以至個別媒體對警員嘅質疑，實在本末倒置，明明有一大班暴徒追打警員，佢哋又好似唔願意譴責暴徒咁；但係當警員拔槍自保呢？佢哋又好似「終於搵到位質疑警察」，一味將焦點放喺警員鳴槍、擎槍一事度；換個角度，如果班政客係一班俾人追打緊嘅警察，佢哋又會點做？同啲暴徒講道理，叫佢哋「束手就擒」？俾人追打、狂毆嘅唔係自己，啲政客、媒體可以「講得輕鬆」，但呢種不斷質疑「受害者」嘅手法，實在令人覺得莫名其妙！ ■
Be the first to comment