理工大學連日爆發衝突，有暴徒喺理大一帶掟磚、襲警、燒警車、掟汽油彈，有部分人堅持同警方對峙，「死守」理大；今日有傳媒報道，有喺理大被警方包圍嘅學生，認為喺校外支援嘅「手足」未如想像地「各區開花」營救佢哋，覺得自己「被外面的人賣了」。囍雨想講，其實呢幾個月以嚟，一直出賣、利用年輕人嘅，係不斷煽動抗爭甚至暴力嘅政客、媒體，所謂違法以至暴力抗爭，事實上一啲都唔浪漫、唔值得英雄化，政客們之所以係咁煽動點火，根本只係為咗達到佢哋嘅政治目的！
理大生「哭訴」
報道中所講嘅「S」，係一個理大四年級生，佢接受訪問表示自己「很怕又氣憤」，哭訴「外面的人一味只在網上出post，為何不來救我們呢？」，雖然「S」喺訪問入面，話網上啲人呼籲「各區開花」，但真正示威嘅地區「屈指可數」，覺得自己被「出面的人賣了」，又話如果咁多學生喺度俾人拉咗，就真係Endgame（終局之戰）。一句講晒，就係以為其他示威者或者反政府人士會救佢哋，但原來好多人根本就無上街「開花」。
無良政客、媒體的煽動
呢個故事睇到人「最心碎」地方，係呢個學生「S」自己一個喺校園內「默默垂淚」，但因為唔想媽媽擔心，到噚日下午都無同媽媽講自己喺理大，只能喺學校搵個地方匿埋，希望能避過追捕。囍雨就覺得，唔理係呢個學生「S」抑或其他學生、年輕人，佢哋其實唔係俾其他人「出賣」，「賣」佢哋嘅，係一啲無良政客、媒體先啱！呢幾個月以嚟，盲反派政客、媒體不斷鼓吹抗爭，甚至美化、浪漫化、英雄化抗爭行動，近日又喺度不斷有意無意地歌頌「留守大學」嘅故事，啲學生以為好浪漫返去校園，點知依家就等俾人拉，囍雨真係想問一句，盲反派政客、媒體，你哋於心何忍？
無論係發生喺其他地方嘅違法行為，抑或發生喺大學校園、校園附近嘅違法行為，本來就唔應該發生，如果無盲反派政客、媒體一直推波助瀾，今日就更加唔會有學生喺大學入面「坐困愁城」；可以預計得到，如果佢哋俾人拘捕、起訴同入罪，人生基本上就「玩完」。盲反派政客好，盲反派媒體又好，你哋係咪仲要煽暴同縱暴？如果係，你哋不如帶埋自己啲仔女一齊上街抗爭，先唔好搞人哋啲仔女啦！ ■
Be the first to comment