「陣線」自打嘴巴

連日嚟「醫管局員工陣線」（下稱「陣線」）以「全面封關」作為訴求、口號發動醫護罷工，要求政府隔離每日數以萬計、來往兩地嘅港人等堵截疫病感染。港府噚日（5/2）宣布新措施，嚴格要求由內地入境香港嘅人士（包括香港居民）都要強制隔離檢疫14日，2月8日凌晨生效。明明新措施與「陣線」訴求同出一轍，但「陣線」代表就反過嚟質疑措施成效，又稱無法評估對本港醫療體系會造成幾多負擔云云。廣男想問，「陣線」其實究竟想點？

「陣線」一直強烈要求「全面封關」，老實講，依家政府對於人流方面嘅最新管控措施，都做到效果，但「陣線」就話會導致「衝關情況無可避免」，咁究竟係封定唔封，不如請「陣線」代表再講清楚啲喇！

建議隔離 又質疑隔離

關於隔離問題，廣男就更加睇唔明。前日，「陣線」就話可以強制隔離啲跨境人士；如果地方唔夠，佢哋就家居「自我隔離」。廣男想講，政府最新安排，咪就係咁囉，仲嚴格過「陣線」要求添（一律強制隔離）！但去到噚日，「陣線」又質疑，如果全部隔離14日，「難以想像香港能有足夠人力物力處理十多萬人的強制檢疫工作」、又驚「香港變成一個大型隔離營」，咁即係點？究竟隔離好定唔隔離好呢？「陣線」咁講，算唔算自打嘴巴呢？

要全面封關 又要「照常物流」

當「陣線」不斷質疑政府措施成效時，咁佢哋自己有冇咩「好建議」呢？有！噚日佢哋重申「『全面封關』定義」時，第一條就包括「隔離14日」，仲註明「即係政府公佈措施」，大家覺得，佢哋算唔算又打咗自己一嘴巴呢？另外，按照「陣線」嘅要求，簡單嚟講就係「內地人唔准入境、香港人必須隔離」，廣男又要問，按照呢個邏輯，又點樣滿足佢哋第三個「要求」，即係「生活物資及抗疫用品照常以運輸物流的方式進入香港」呢？依家政府建議運輸從業員可獲豁免強制檢疫，咁「陣線」唔驚呢啲人員、物資將病毒帶入香港？佢哋就話「加強檢驗」，但具體點做？又講唔出下文喎。

講真，睇完「陣線」一番「訴求、建議」，廣男都覺得好混亂，唔知可行性喺邊；真心想問番句，其實「陣線」知唔知自己究竟想點？講嘢有冇邏輯呢？當佢哋不斷美化到自己罷工有幾「崇高」、如何「為香港好」時，大家唔好忘記，代價就係令其他堅守崗位嘅醫護百上加斤、令眾多最需要照顧、急切「等救命」嘅病患命懸一線。大家認為，呢班人仲算唔算醫護呢？廣男奉勸「陣線」一句，唔好再話自己「代表醫護界」，你哋可以唔要自己嘅專業道德，但唔該唔好再踐踏其他正在抗疫醫護嘅尊嚴！■