區域法院法官郭偉健因為處理一宗斬人案時發表咗引起爭論嘅評語，不斷被反對派政客同媒體攻擊，最新消息，有三單本來由佢處理、關於反修例嘅案件，會改為其他法官代為審理。對於郭偉健被撤換，囍雨想講，郭官當時分析案件，接納被告指如果無反修例事件，被告唔會作出攻擊行為，相信被告係受失業、離婚同社會氣氛影響；唔少媒體、別有用心嘅人，就攞郭官其中一兩句評語嚟攻擊佢，認真問一句，咁樣係咪以偏概全、以言入罪，甚至藐視法庭？
判刑合理是重點
其實郭官喺判刑時所講嘅，係一個故事嘅脈絡，涉事被告因為修例事件影響到佢生計甚至生活，喺無意圖同無預謀犯案，可以話係一時衝動，傳媒要抽佢其中一、兩句說話嚟攻擊佢，其他人都無話可說，但有三點，囍雨想喺度分析下。
首先，誠如前刑事檢控專員江樂士所言，今次郭偉健嘅判刑係合理嘅。就關於引起爭議嘅斬人案而言，區院最高判可以判監七年，郭偉健以六年為量刑起點，再考慮到求情、被告認罪等因素，得出判監三年九個月的判決，可以話係重判。第二個問題，資深大律師清洪就點中咗要害，如果郭偉健喺判辭支持示威者，泛民嘅反應會唔會截然不同？最後一個問題，由資深大律師湯家驊指出，湯家驊唔排除調配安排有「弦外之音，暗示倘若法官持有特定政治立場，就會被調走，對部分法官或許構成壓力」。即係司法機構調走郭偉健，係想保持中立，但咁樣做會唔會產生反效果呢？
只可偏袒黑暴分子？
老實講，囍雨唔係法律界人士，當然無專業嘅法律知識去評論一件事，但囍雨一直睇開新聞，不時見到法官對被告（包括黑暴案件）嘅被告「予以同情」，點解又無事嘅呢？今次被告變成藍絲，受害對象變成係黃絲，就有咁大反差？盲反派成日話有寒蟬效應，恐怕如果真係有，而且出現喺法律界，就係以後法官就算反對黑暴都好，都未必敢表達意向。
有人話，法律界係一個「黃絲竇」，囍雨唔敢肯定，不過，囍雨真心想問下，點解侮辱國旗，初審判刑時可以唔駛判監？點解違法佔領時搞到香港立立亂，有被告連一日監都唔駛坐？反政府人士有疑問，囍雨都有疑問！■
Be the first to comment