自由？真係一樣「好好用」嘅嘢，戴耀廷因為犯法、教人犯法被大學「炒魷」，就話呢樣同學術自由有關；攬炒派搞未經批准集結，就話市民有集會、遊行「自由」；近日，黎智英因為「勾結外國或境外勢力危害國家安全」等罪被捕，警察到黎智英喺蘋果大樓嘅辦公室搜查，結果當然係又俾攬炒派話「打壓」甚至「絞死」新聞自由，但囍雨唔明白，一個人涉嫌觸犯《港區國安法》，關新聞自由咩事？係咪傳媒老闆犯法就唔使拉？
事件與新聞自由無關
就如國家安全處高級警司李桂華所言，有多名傳媒高層用外國戶口財政上支持一個「要求外國制裁香港」嘅團伙，李所指嘅「多名傳媒高層」，明顯就係講《壹傳媒》或者《生果報》嘅人，呢件事，好明顯同傳媒機構日常採訪、做新聞無關，咁拘捕以至搜查，根本就唔關新聞自由事。
囍雨進一步推論，如果呢件事真係關乎新聞自由，有人要打壓《生果報》做新聞，甚至「阻止」佢哋繼續做新聞，咁《生果報》今日仲會出版，仲要印超過50萬份？喺今次件事，攬炒派以至一啲傳媒組織都非常強調「新聞自由」，但囍雨覺得奇怪，點解佢哋唔去評論或者分析下黎智英因何事被捕，黎智英所做嘅，又係咪涉嫌違法呢？
重點：黎智英有否涉嫌違法
睇返黎智英過去嘅「所作所為」，曾經要求過外國干預，曾經表示自己「為美國而戰」，成件事嘅重點只有一個，就係喺「港區國安法」正式生效之後，黎智英以至其「手下」有冇做過涉嫌違反「港區國安法」嘅嘢，如果黎智英本人有咁做，咁拘捕佢唔會有問題；又或者，如果佢同「手下」有財政支持啲犯咗「港區國安法」嘅團伙，咁一樣有罪嫌。喺呢件事上，社會應該討論或者聚焦嘅，係法律問題先真！
拘捕黎智英以至《壹傳媒》其他人，搜查佢哋嘅辦公室可以話係在所難免，攬炒派可能想將事件拉扯到新聞自由問題；但囍雨想講，無論攬抄派點講，黎智英本身假如有犯法，就算佢哋嘅宣示叫得幾響亮都好，一樣洗脫唔到黎智英嘅罪嫌，因為中央、港府以至警察執行《港區國安法》嘅意志相當堅定，既然美國所謂「制裁」都唔怕，又點會怕其他人借機攻訐、抹黑？■
Be the first to comment