對於現任攬炒派立法會議員係咪應該接受延任、繼續履職唔少於一年嘅問題，早幾日，香港民意研究所（香港民研）就話會透過「我們香港人」意見群組「了解民意」。話咁快，今日已經有結果啦。根據公布數字：自稱民主派支持者嘅受訪者共有21,367人，其中63%人反對泛民留任，20%人就支持留任；而連同非民主派受訪者，就有23,072人接受訪問，結果係，35%受訪者支持立法會議員留任，47%受訪者反對；至於另外隨機訪問嘅1,012人，支持泛民留任嘅係37%，反對佢哋留任嘅係41%。
反對攬炒派留任者佔多數
簡單嚟講，就係無論點計，反對現任攬炒派議員留任嘅民意，都多於支持佢哋留任者。咁啱得咁巧嘅係，早前曾經質疑「去留交付民意會否出現結果被操弄」嘅民主黨主席胡志偉，噚日帶住黨內幾個「有得延任」嘅立法會議員出嚟宣布，就住「去留」問題，會委託「有公信力、獨立」嘅機構，做「全港性、科學的民意調查」，並且會服從民調結論。
咁問題嚟啦，依家就有一份「民意」擺在眼前，囍雨好想問下胡志偉以至其他攬炒派，依家多數聲音係叫你哋「走人」喎，你哋會唔會「服從、尊重」呢個民意先？嗱，當胡志偉「巧合地」喺今次民調前一日，話會委託機構做民調時，其實好難唔令囍雨有所聯想同質疑，攬炒派係咪一早預咗有今日呢個結果、而提出要做另一個「有公信力、科學」嘅民意調查、去得出對自己有利嘅結果呢？
民主黨想要另一份「民意」？
所以囍雨跟住想問，民主黨呢個民調打算點做？由邊個做？點先叫「科學、有公信力」、把尺由邊個定？咁又係同一個問題：民意會否被操弄？又或者，所謂「民意」，從來都只係攬炒派「根據需要」而設置出嚟？
仲有一點，囍雨留意到，早前啱啱先講完「不留任」嘅陳志全、同埋聲言要「杯葛議會」嘅朱凱廸，呢兩日已經表示願意跟大隊、願意「受民調約束」，囍雨又想問下大家，咁嘅轉變之中，有冇古怪呢？會唔會係有人想「跟從」一個對自己相對有利嘅民調、為繼續延任鋪路呢？
唉！說到底，豐厚薪津誰願放手？
所以話，政治呢樣嘢，真係「一日都嫌長」；攬炒派呢場政治騷，「越演越醜陋、越演越荒謬」，未來仲有幾多劇情大反轉呢？大家信唔信——其實攬炒派所謂考慮「去留」問題，講嚟講去，只係考慮「如何包裝」嘅藉口問題；又或者睇下「誰願放手」、「邊個去邊個留」嘅問題。換個角度諗，如果一個立法會議席，唔係意味住權力，唔係意味住一年有400萬元有多嘅薪金、津貼，咁「去留」仲會唔會係一個咁難「抉擇」、咁多爭拗嘅問題？■
Be the first to comment