警察修改《警察通例》下「傳媒代表」嘅定義，有報導指《通例》中有關警員配合傳媒工作嘅要求，由過去「在事發現場的人員，須以互讓互諒的態度，盡量配合傳媒工作；以及不應妨礙傳媒的攝錄工作」，改咗做「人員在不影響行動效率的情況下，應以互讓互諒的態度，盡量配合傳媒工作；以及不應妨礙傳媒的攝錄工作」，記協主席楊健興批評警方「日後一句話影響行動效率，就可以唔使配合傳媒工作，即係自己畀咗自己更大更多嘅權力，以後可以想點就點」，廣男想問下，如果喺一個示威現場甚或一個暴動現場（犯案現場），警方喺唔影響行動效率下配合傳媒工作，有咩問題呢？
別什麼都攻訐
對於楊健興嘅質疑，包括佢話警方俾自己更多權力、以後「想點就點」，廣男唔係執法人員，但用常理去諗呢件事，如果警察、暴徒同記者身處同一個衝突場面，大家認為警方最優先要做嘅，係咩事呢？「盡量配合傳媒工作」？有啲人或者覺得係，但廣男就覺得，警方最先要做嘅，就係控制好場面，同埋拘捕疑犯；至於配合傳媒工作，當然需要，但以唔影響行動為前提，其實係合理㗎喎！
新聞自由，重要；但警方執法、維持治安，一樣重要。廣男唔知大家仲記唔記得，之前7.21事件一周年，喺元朗商場有近200名「黃背心」人士包圍在場數十名警察，令他們寸步難行，廣男又想問下楊健興或者記協，喺呢個情況下，係警方「唔配合」記者，定係記者「阻住」警方？而呢班人當中又有部分人講唔出自己代表邊間傳媒，又或者無記者證，咁楊健興或記協，認為呢啲又係咩人？自由記者？定係「表面記者，實則示威者」？
記協有份種的禍
警方要修訂《警察通例》下「傳媒代表」嘅定義，記協感覺「如臨大敵」，但廣男想講，記者以至「假記者」干擾警方執法嘅問題，唔係呢一頭半個月嘅事，記協喺呢段持時間，有冇努力同警方合作解決問題？有冇就警方執法受阻發過一句聲？執筆之時，廣男睇到記協開咗個記者會，表示會研究就警方修改作司法覆核；司法覆核係任何市民嘅權利，但廣男要講句，「記者」阻礙警方執法嘅問題，始終都要解決，今次只係警方毋懼抹黑，勇敢地行出咗第一步。 ■
Be the first to comment