通常喺咩情況下，大家會話自己被逼？一個簡單嘅例子，就係當有人被賊打劫嘅時候，會被逼交出財物，呢個道理好易明。廣男勢估唔到，原來每月高薪厚祿都有得「被逼」，講緊咩人？當然係攬炒派立法會議員啦，話說噚日立法會開會，張超雄發言時表示第六屆立法會應早已完結，目前議會違法違憲，聲稱「我不應該還在這裡說話」，自言留喺議會係「逼不得已」。被逼每個月袋十萬元薪津，廣男想講句，真係辛苦晒！
又要錢 又要戴頭盔
張超雄呢番說話，廣男覺得佢「可能」係講緊真心話，但客觀效果就係，有攬炒派議員聲稱自己「唔想做」、「唔想講嘢」，但依家就每個月袋十萬元人工，仲有最少200幾萬辦事處開支津貼，而且可能仲會有約滿酬金，廣男想問下張超雄，呢啲算唔算係「又要錢，又要戴頭盔」？咁難為你，咁點解唔離任？
呢件事諷刺嘅地方，係攬炒派成日要攬炒香港，新一代參選立法會嘅政客甚至話要否決政府財政預算案，但原來當佢哋支持黑暴、攬炒香港嘅時候，佢哋永遠唔會俾自己「被攬炒」；至於其他所謂「手足」，佢哋俾人拉好，俾人告好，坐監好，無咗份工也好，根本就唔喺班政客嘅考慮之內，正如有啲街上宣傳品所講，佢哋只係「守護糧支」，或者「我仲要供樓」一樣，認真肉酸。
話說回來，喺噚日嘅立法會會議，雖然攬炒派係咁點人數，但廣男想同大家講，呢班政客基本上已經黔驢技窮，傳聞所講嘅激烈抗爭無出現，甚至佢哋連衝擊下都好似唔敢；之前內委會由郭榮鏗做主持，開咗16、17次會、搞咗7個月都選唔到主席，《港區國安法》實施後，開一次會就搞掂，相信攬炒派政客會「守住議會」嘅支持者，睇嚟仲有排失望。
乖乖做議員吧
守護「糧支」，睇錢做人，唔緊要，但喺《港區國安法》嘅震懾下，一班攬炒派政客明明「唔敢」做啲乜，點解仲成日扮到「好抗爭」咁款？佢哋就算呃到老一代、溫和啲嘅支持者，後生果一班，老早睇穿佢哋把戲啦！ ■
Be the first to comment