喺香港，邊個媒體最支持特朗普？唔駛問，梗係《生果報》啦，為咗支持Trump Trump Trump，《生果報》老闆黎智英嘅助手Mark Simon，仲用黎智英公司嘅錢去委託人寫涉嫌造假、抹黑特朗普對手拜登及其子嘅報告，事後黎智英「割席」都「割唔切」。廣男近日不斷喺度諗，Mark Simon甚至黎智英擺明「做」拜登，如果拜登真係當選美國總統，咁黎智英會唔會從此「無運行」呢？
美國將趕絕黎智英？
有分析指出，不論係特朗普定係拜登當選，兩者都未必再看重黎智英，如果特朗普連任黎智英今次係「擦錯鞋」辦事不力，而如果係拜登當選，更加唔會罷休，一定會嚴正追究黎智英等人「惡意抹黑」呢筆帳，甚至唔排除就此啟動調查云云。簡單嚟講，就係黎智英仲想有運行？好難喇！
呢件事所反映嘅，廣男覺得最重要一點係，就係黎智英好，Mark Simon好，兩個夾計都好，作為傳媒人或者傳媒人嘅助理，根本就唔應該去干涉選舉，而且係其他國家嘅選舉，仲要係涉嫌「造假」地干預選舉，在傳媒行業而言，呢個絕對係大忌。
形勢有變 報導轉軚？
其次，就係喺涉嫌「造假」抹黑拜登父子事件上，Mark Simon成為咗黎智英嘅棄卒，情況就好似黑暴運動中年輕人成為政客棄子一樣；咁今次黎智英「水洗都唔清」，佢又會唔會成為美國政客嘅棄卒呢？所謂剃人頭者，人亦剃其頭，黎智英玩弄政治咁耐，荼毒過咁多年輕人，佢自己今次俾政治玩死，真係一啲都唔奇。更重要嘅係，黎智英一直咁高調「反中亂港」，當中最大後盾，其實係美國嘅政客，依家佢被指干預美國選舉、政局，咁佢日後有事，美國仲係咪咁出力「保佢」？又或者，佢喺香港嘅「攬炒派金主」、「大台」、「黨鞭」地位，仲會唔會好似以前咁穩固呢？
噚晚，有朋友分享一啲《生果報》新聞俾廣男睇，從標題以至內容睇嚟，《生果報》支持特朗普嘅態度似乎有啲軟化，甚至開始有啲想轉軚；廣男想講，如果撞咗車先嚟扭軚，有咩用呢？車毁人亡，政客（傳媒人）玩火，總有後果。■
Be the first to comment