喺舊年嘅區議會選舉，攬炒派聲稱自己「大獲全勝」，約有380名攬炒派政客贏得區議會議席；一年過去，有傳媒就做咗個統計，原來今年至少有60名攬炒派區議員涉嫌干犯唔同罪案而被捕或被控，有網民批評佢哋「攬炒當政績」、支援黑暴被捕者當正職。見到問題叢生嘅攬炒派區議員，大家係咪覺得有需要整頓一下佢哋呢？
逾15%攬炒派議員被捕
一個幾得人驚嘅數字，就係大約380名攬炒派區議員當中，至少有60個今年被捕甚至被檢控，即係有超過15%嘅攬炒派區議員，都涉嫌違法甚至已經被檢控，當中包括民主黨鄭麗琼、許智峯、林卓廷、尹兆堅等人，其他被捕攬炒派議員有梁晃維、仇栩欣、岑子杰、岑敖暉、張秀賢同譚凱邦等人；所牽涉嘅罪行，既有暴動罪、參與非法集結、藐視法庭、妨礙司法公正等，據報甚至連涉嫌違反《港區國安法》都有，囍雨想問下，攬炒派區議員，算唔算係「犯罪集團」？
睇返過去一年多時間，除咗攬炒派區議員涉嫌違法之外，各區議會可以話係亂象不斷，例如有區議會話要喺地區討論政制同「入境」事務，有議員助理被質疑不斷喺不同區議會「攞資助」，傳出私相授受嘅醜聞；有啲區議員，甚至以抹黑政府、警隊為樂，街上宣傳品以至區議會，都成為佢哋做政治抹黑嘅工具或手段。
表明拒絕服務部分市民
唔知大家仲記唔記得，之前有元朗同深水埗區議員，公開表明拒絕服務一啲政見唔同嘅市民，計及以上嘅種種亂象，大家覺得唔需要理區議會嘅問題？唔好話囍雨多心，立法會議員係公職人員，區議員都係公職人員，如果立法會議員要遵守一啲不可違反嘅原則，點解班攬炒派區議員又好似無王管，做乜都得呢？
區議員嘅權力，雖然無立法會議員咁大，但大家要明白一點，就係每一個喺地區嘅區議員，佢哋每日所接觸嘅，就係區內每一個街坊，包括年輕人同小朋友；佢哋部分人如果喺區內傳播不法歪風甚至「反中」思想，後果會係點呢？超過380個攬炒派區議員，可以變成380個政治炸彈，佢哋有權反對一啲地區政策或事務，但如果係借身份、用公帑反政府、反中央，囍雨就覺得不能接受喇！ ■
Be the first to comment