喺香港出版咗26年嘅《生果報》，因為報章董事、高層甚至公司本身涉嫌違反《港區國安法》，部分資金又被凍結，最快24日就會停止運作。23日，囍雨睇到一單新聞，指有人透露《生果報》被凍結嘅資產只佔每月成本約四分一，而之前《壹傳媒》曾於5月發公告指，截至2021年3月31日，該集團嘅現金結餘超過5億元。有消息指，《生果報》根本唔缺錢，所以《生果報》被斥責賣弄慘情，企圖博取外界同情。撇除《生果報》賣慘，囍雨反而開始諗，如果香港無《生果報》，媒體生態會唔會耳目一新、重回正軌呢？
利用謊言反中央
近日，唔同嘅媒體機構開始為《生果報》「埋單計數」，就如囍雨之前所講，我哋可以用「干政」、「假」同「淫」去計呢條數，例如《生果報》屢屢煽動市民上街，甚至不惜勾結外國勢力，叫外國嘅總統干預香港事務，係最明顯嘅「干政」例子。今日，囍雨反而想講講反修例期間發生過嘅事，等大家「重溫」下《生果報》如何喺反修例運動期間，全力煽動仇恨。
以「爆眼女」事件為例，依家大家都知道所謂「爆眼女」，原來根本就無爆眼，不過喺「爆眼女」受傷後，《生果報》就大大力疑似造假新聞，例如喺報道稱「據悉，少女傷勢嚴重，送院時受傷右眼因眼球及組織移位，右眼眶仿如留下一個洞，除眼球爆裂，右眼皮及淚管亦撕裂，在右眼下方的上頜骨整塊全碎」；多得《生果報》等媒體大力撥火甚至造假，「以眼還眼」等煽暴口號以至一系列抗爭行動，先得以「越演越烈」！
又例如，所謂「新屋嶺警員性侵被捕人士」一事，大家都知道係假嘅，甚至喺網上散播謊言嘅人都已經被判坐監，囍雨睇返前年嘅新聞，單單係一個月內，《生果報》就有「中大女生再揭警性暴力：有男被捕者於新屋嶺被輪姦及雞姦」、「倡新屋嶺性侵受害人求助風雨蘭創辦人：起碼有個大picture」等新聞，呢啲新聞算係報導，定係配合撒謊者造假？
向謊言、淫褻說不
基於《生果報》嘅乖戾作風，如果《生果報》日內關閉，喺可見嘅將來，我哋至少唔會見到有媒體大力「干政」，叫人上街抗爭；唔會為咗政治目的「造假」；亦唔會因為想政府冧檔而叫外國干預香港事務。一個正常嘅媒體生態，應該係傳媒享有新聞自由，但不論媒體老闆嘅立場如何，都唔應該造假、誨淫誨盜，甚至違反法律。囍雨期待，沒有《生果報》嘅香港，再無年輕人被蠱惑，唔會走上違法達義之路，繼而自毁前程，這才是一個正常的香港！■
Be the first to comment