邵家臻的「無賴理論」

自從大量攬炒派政客相繼入獄或者還押後，攬炒派間就興起一股「監獄維權風」。正還押嘅前本土民主前線成員鍾雪瑩，最近向法庭申請司法覆核，挑戰懲教署規定女性囚者須穿長褲嘅規定。件事本身冇乜特別，咪等法院決定受唔受理囉，但因為立法會社福界前議員邵家臻嘅一個帖文，單嘢就成為網民嘅焦點。邵家臻聲稱，司法覆核申請被傳媒報道之後，鍾雪瑩身處嘅監倉就比人「徹底搜查」，搵到朱古力、筆等名額以外嘅物資，而涉事者就被「釘倉」（單人監禁）七日；佢質疑署方係「揸正」執法、大興問罪。囍雨想問吓邵家臻，佢嘅意思係咪攬炒派疑犯有特權，鍾意喺監獄做乜都得，就算違規都要當睇唔到？

「理直氣壯」地犯規？

講真，囍雨覺得，邵家臻嘅思維都真係幾奇怪。本身今次件事一句講晒，懲教人員巡倉發現有在囚者違規，處分執法都好正常！邵家臻依家仲拉埋司法覆核單嘢嚟講，形容到好似懲教人員有意針對鍾雪瑩咁，但係兩件事有咩關係先？事實係，鍾雪瑩個倉有人係違規「斷正」嘛，即係懲教人員發現都唔應該處理？若然處理，就係「大興問罪」？邵家臻講到好似犯規就理直氣壯，執法就係唔啱，根本就係打橫嚟講嘅「無賴理論」。

盲撐包庇並無好處

其實，邵家臻身為社工，可唔可以講吓道理？今次件事，明顯係鍾雪瑩個倉有人犯錯，大大方方認錯咪算囉，邵家臻硬係要搞大件事，其實係好不負責任。之前支聯會副主席鄒幸彤，亦因為同其他囚犯「分享郵票」，被罰囚水飯房3日，當時邵家臻亦講到大義凜然咁，話懲教署有好多規則，但大部分都唔會嚴格執行，「經常有走盞位」，又形容囚犯間分享物品係「司空見慣」，批評署方針對鄒幸彤係對政治犯採取最嚴格標準等等。係囉，又係咁囉，即係攬炒派犯規就「經常有走盞位」，唔應該罰，呢個咪邵家臻嘅標準囉。

點都好啦，唔理邵家臻係想「抽水」博大眾關注，定係想制造輿論壓力，迫懲教人員妥協「放生」攬炒派中人都好，希望社會大眾都明白，任何人喺獄中犯規都唔應該盲撐包庇，咁樣絕對唔係幫緊佢哋，而係害咗佢哋。每當做錯事、犯規都有人「聲援」，試問佢哋又點會知錯、反省？身為曾經坐過監嘅「過來人」邵家臻，亦理應明白呢一點囉！■