陳健民答「佔中」捐款　話要「等埋副校」？

囍雨之前講過，香港舊年無啦啦畀人非法佔領咗七十九日，對市民帶來不便不特止，仲將社會完全撕裂晒，發起「佔中」嗰幾位學者、牧師，在情在理都應該將搞「佔中」盤數拎出嚟，向社會有個交代都好應該啫！

不過好可惜，繼戴耀廷後，另一個發起人陳健民面對記者質詢時，同樣都係答唔出幾時交得出本數薄，仲無啦啦疑似「鬼拍後尾枕」，承認「佔中」同「港大遴選副校長」兩者係有關係！嘿，連陳健民都話要「等埋副校」，背後究竟有咩文章呢？

回應質詢　陳健民支吾以對

今日有報章報道，當陳健民被問到幾時可以交出「佔中」既財務報告時，陳健民咁答：「我們現在正……你們看看港大這麼麻煩的事情，我們也不想在這個時候再引發太多爭論。我們自己好有信心最後一定會交代。」、「我想等到港大事件平息之後才作打算，因為始終涉及財政有關問題，所以我想等待港大事件平息才交代。」

講來講去，即係講唔出幾時可以交份財務報告出嚟啦！但係點解要「等埋副校」呢？

「佔中」同港大選副校有關係？

無啦啦將「交代佔中財務報告」同「港大副校長遴選」拉埋嚟講囉！對於呢位有博士學位既學者，囍雨真係好想喺度好理性咁向陳健民請教：「乜佔中同港大副校長遴選原來有關係架？係咩關係呀？係唔係條數對某位你哋心儀既副校長候選人不利，即係陳文敏教授呀，所以要收埋先？」

呢個只係囍雨個人既提問，並唔係嗰啲「劉進圖式」既「放風當評論」，呢個只係本人心目中既疑問，唔係指控嚟架。

到底幾時交財務報告？

不過咁，事實係，陳文敏喺做港大法律學院院長期間處理下屬戴耀廷所收受既捐款時，決策同程序受到質疑，港大委任既審核委員會認為佢表現「不符預期標準」。至於涉事既捐款呢？會唔會真係用嚟支持「佔中」相關活動架？嫌疑好大囉！

家陣陳健民講明要等「港大事件平息」，先至考慮公開「佔中」既財務報告，當中到底有咩考慮？兩件事到底有咩關連？相信市民都好想知。如果兩者係冇關係既，咁即係陳健民只係是旦搵個藉口去敷衍市民啫，咦，咁佢哋所謂既道德高地咪冇晒囉？市民既要求好卑微啫，請「佔中」三人組唔好再拖啦！■