嘩！黐線，簡直係典型「天仙局」，仲衰過電話騙案，乜咁都有人受？講緊嘅係「青年新政」兩個史上「最短命」立法會議員梁頌恆同游蕙禎。呢兩個人形物體尋日聲稱，會就宣誓案上訴到終審法院，話隔咗上訴法庭裁決四星期先上訴，全因研究後發現有新法律觀點，深思熟慮後決定上訴。佢兩個仲講明自己冇錢架，呼籲公眾繼續科水，否則就要放棄上訴喎。似曾相識，十足十「寶藥黨」、「祈福黨」一樣，今日香港真係仲有傻人落疊？
「青年新政」係「假概念股」
「青年新政」去年突然冒起，九月立法會換屆選舉一舉拎兩席，背後原因唔分析太詳細喇，反正佢兩個已經係「前」議員，講都多餘。佢兩個之所以當選，唔多唔少都有「概念股」成份，食住部份選民「求新求變」嘅心態，結果咪喺「冇經驗、冇政績、冇政綱」三冇情況下，只得「口號」都可以勝出囉。話佢兩個係「概念股」一啲都冇錯，只不過佢兩個係「假概念股」咁解啫。
點知好衰唔衰，呢兩個「假概念股」原來只係「天仙局」，宣誓期間無啦啦玩嘢辱華，得罪全球華人兼幾千萬二次大戰死難者，結果因為違法《基本法》同《宣誓及聲稱條例》而被法庭取消議員資格。去到呢一步，投票畀佢兩個嘅選民，相信唔少已經醒覺跌咗落「天仙局」，痴心錯付呀陰公！
叫人捐錢 但唔交代理據
兩個騙子，衰咗好心就生生性性重新做人啦，香港人好厚道，好快就唔記得你兩個人形物體；點知佢兩個死不悔改，尋日又走返出嚟賣概念，口口聲聲話自己「有新法律觀點」喇，你捐錢畀我上訴啦，冇錢我上訴唔到架。可能有人會問，咁所謂「新法律觀點」係乜呀？SORRY喎，呢兩個騙子話唔講得畀你知，因為「冇必要畀人知我哋揸住啲乜喺手」喎！
呢次真係「一百歲唔死都有新聞聽」，你要上訴，得，咁理據係乜呀？唔使人捐錢的話，鬼理得你咁多吖，法庭受咪得囉。但而家唔係喎，要人課金畀你哋上訴，至少都要向捐錢畀你哋嘅人交代吓啩？又嚟口講口賠？唔好咁啦！
呢單嘢真係唔使囍雨再鬧太多，佢兩個至今總共收到四十幾萬捐款，已經全部用嚟畀律師費。大家真係甘心繼續捐錢畀佢兩個，益嗰班口口聲聲「有得打」嘅律師？唔係呀嘛？不過咁，錢係大家嘅，如果有人想捐，外人都冇得阻止，囍雨最多講句：「祝君好運」囉。■
Be the first to comment