黑暴攬炒香港，你會諗到啲乜？百業蕭條，人人自危？定係有危就有機，話唔定可以從中搵到商機？喺黑暴期間，曾經有意見指有大狀接黑暴被告案件，狀似做得唔錯；不過黑暴未完，就有新冠肺炎肆虐全球，連法庭都要「停擺」，據報搞到有啲大狀「無錢交租」咁濟，身為大律師公會主席嘅戴啟思，就急急去信律政司同法援署，提醒對方盡快「找數」。今日囍雨睇新聞，又見到戴啟思建議立法，令法庭可以透過視訊、電話審訊，又表示會研究喺呢段「空檔期」，點樣喺經濟上減輕各成員負擔。囍雨對於呢種倡議，只有一種反應，就係法律界依家先知攬炒之苦？
是處理積壓案件 還是大狀荷包？
根據傳媒報導，戴啟思表示大律師公會認為應「制定《緊急法》以允許司法機構進行遙控的視像或電話聆訊，令大量堆積的刑事或民事案件，能夠順利進行審訊」，又向成員表示正在研究點樣喺經濟上減輕成員負擔。問題嚟喇，戴啟思呢個倡議，係想法庭加快處理好積壓案件，定係想啲大狀可以「有工開」？又或者兩樣都係？
對於係咪立法甚至制定《緊急法》准許法庭用視像或電話聆訊，囍雨無特別意見，反而見到戴啟思近月咁「用心」為會員謀福祉，好似幾擔心啲會員「無工開」嘅時候，其實佢有冇諗過之前黑暴運動時，好多行業包括旅遊業、零售業、酒店業、運輸業以至飲食業等，全部都叫苦連天，果時戴啟思等大律師公會成員，有冇為其他人嘅飯碗、生計發聲？定係企咗喺黑暴果邊呢？囍雨隨手上網睇下，見到戴啟思批評政府嘅說話就唔少，批評黑暴打爛人飯碗？Sorry，暫時唔係好睇到！
做人要將心比己
如果戴啟思、其他大律師公會成員以至大狀們一早感受到攬炒之苦，就會知道支持黑暴，其實係支持暴徒用特別方式「謀殺」香港人；依家無論戴啟思講咩、倡議啲咩，香港已經俾黑暴攬炒咗一半，再俾疫情攬炒埋另一半。如果真心想會員唔會無飯開、無錢交租，其實簡簡單單，應該企喺反暴力、反破壞一方，唔好再為暴徒「背書」；否則暴徒可以攬炒唔同行業，一樣可以攬炒埋大律師、律師！■
Be the first to comment