「青年新政」梁頌恆、游蕙禎喺立法會宣誓時用英文將中國讀成「支那」，引起全城公憤。政府、政黨甚至網民都群起而攻之，誓要二人為侮辱中國嘅言論道歉，甚至有唔少人要求二人辭職添。囍雨認為，佢兩個今次已經唔係單純「反政府」或「玩嘢」咁簡單，相信係有人為咗「Draw Attention」同抽水，刻意拎一個嚴重侮辱嘅貶義詞嚟形容一個國家、同胞，各界一定唔可以放過呢兩個人，直至佢哋向公眾道歉為止。
囍雨聽到「支那」兩個字真係好嬲，嬲到幾個鐘唔識出聲。有中史老師亦批評，佢兩個有權唔認係中國人，但就冇權侮辱中國。不過最過份都係，啲人衰咗又唔認衰，喺度兜嚟兜去，畀人感覺真係好下流。好似梁頌恆咁，明明自己講咗侮辱國家嘅說話，仲要話自己「家鄉鴨脷洲啲英文係咁樣」，囍雨想講，如果梁頌恆咁講法係真，係咪我哋搵到唔少「家鄉鴨脷洲」嘅人唔係將英文嘅中國讀成「支那」，證明到佢係講大話，而佢又唔肯為侮辱言論道歉，佢會引咎辭職先。有啲嘢佢自己講完都無人覺得好笑，好心佢就唔好講「爛Gag」啦！
「支那」字眼極具侮辱性 不容狡辯
囍雨知道，一定會有人搵藉口為梁頌恆、游蕙禎二人開脫，話「支那」兩個字開頭無咩貶意，係之後因為歷史發展個字先變到有其他意思，所以講呢兩個字都冇咩問題。囍雨同樣非常唔贊同呢個講法，囍雨閒時都會睇下書，曾經睇過有關詞義嘅論述，試問一個詞語真係會開頭定咗個意義，之後就唔會變咩？答案係唔會，因為一個詞語嘅意義，係在於人喺生活中點樣應用佢哋；當其他人用「支那」呢個字嚟矮化中國人，唔係仲要死拗呢個字okay呀？！
如果梁頌恆、游蕙禎願意收回言論同埋向公眾道歉，都算佢哋仲有番少少良知，否則大家一定唔可以罷休，今日如果姑息侮辱自己國家嘅言行，他日只要政見唔啱，其他人佢哋一樣唔會尊重。手執所謂民主嘅旗幟並唔係大晒，香港唔需要唔識尊重自己國家、人民嘅立法會議員。■
Be the first to comment