近期青年新政梁頌恆、游蕙禎單宣誓案引起全城關注，大家都非常關心兩名拒絕誓詞、辱華宣獨嘅「前」立法會議員最後會唔會自食惡果（而家已經冇咗議席）；喺事件上大家都仲有少少疑問，就係梁、游當初戴住本土民主前線梁天琦嘅所謂「光環」當選，但呢幾個月梁天琦銷聲匿跡，到底去咗邊呢？主角近日終於都露面，承認自己「懦弱」外，仲話自己好多時候「得個噏字」，所以決定去讀書喎！嘩！搞咗咁大個大頭佛出嚟，又話要革命、推翻政權咁，推咗咁多年輕人出嚟「送死」，然後自己走咗去？好冇良心啫！
參政者必須有政治道德
廣男唔係話讀書進修唔啱，我本身都好鍾意讀書同鼓勵人進修，但梁天琦呢個case就有啲唔同囉。首先，今年大年初一，梁天琦同佢「戰友」黃台仰等人喺旺角搞暴動，令好多警察受傷之餘，亦有唔少年輕暴徒被捕；之後佢喺二月嘅立法會新界東補選，挾住「偽本土，真港獨」嘅「威勢」拎咗6.6萬票，當時佢仲趾高氣揚話以後香港嘅議會「三分天下」，本土派佔有一席位咁話。
之不過去到梁、游被司法覆核案，佢嘅繼承者梁頌恆、游蕙禎仲帶隊到中聯辦玩衝擊，身為始作俑者嘅梁天琦從未露面，佢開咗個頭叫人抗爭、掟磚甚至革命，而家自己拍下屁股話去讀書，咁對支持者公平咩？
對於種種暴力嘅示威、抗爭行為，廣男絕對唔係鼓勵梁天琦留喺香港「搞革命」，而係，如果梁天琦都覺得自己呢套論述得個「噏」字，玩落去冇結果的話，咁就算走都好，都應該公開同支持者講清楚，等大家唔好繼續玩呢個遊戲。偏偏，梁天琦而家講句自己「懦弱」、「將來再有大型抗爭運動，勇武抗爭都要自我保護」，俗啲講「拍拍屁股」就走，咁年初跟你哋去衝、去犯法嘅年輕人又點呀？畀人告埋你先同佢哋講得隻「桔」？呢啲政客真係害人不淺。
本土支持者難自處
老實講，如果梁天琦甚至黃台仰等人仲有啲良知，唔該而家行返出嚟，大大聲聲叫班支持者「鳴金收兵」，而唔係而家咁，去美國哈佛呀、去英國牛津呀咁進修。佢兩個就風流快活，其他人就因為暴動、襲警被捕，部份後生仔前程盡毁，廣男真心戥呢班人唔抵，同時亦想講，無論大家聽到咩偉大嘅「論述」都好，行動之前唔該都諗清楚，唔好畀人「用完即棄，自食惡果」！
Be the first to comment