壹傳媒創辦人黎智英日前獲美國副總統彭斯、國務卿蓬佩奧係華府接見，據報係為咗討論近排香港發生嘅幾次大規模示威遊行，以及香港嘅「一國兩制」問題。囍雨就覺得，咁睇嚟，黎智英真係「好唔簡單」喎。但問題嚟啦，當一個所謂嘅「傳媒人」，積極參與違法佔中、又成日捐錢畀班盲反派，已經為人所詬病，依家黎智英仲要去到外國見政府高層、傾香港問題，而且獲如此高規格接待，大家真係要問一句，一個媒體負責人插手政治，仲要向外國嘅政府「匯報、商議」，係咪適合呢？佢究竟係咩身份呢？仲係咪單純接見咁簡單呢？
囍雨睇過相關報道之後，就覺得真係疑點處處。例如報道引述黎智英嘅私人助理Mark Simon話，蓬佩奧同黎智英傾到香港局勢、人權，以及宏觀嘅中國同台灣問題，仲進行咗「建議性商討」，而黎智英就「感謝蓬佩奧」，因為「美國政府鼓勵國際社會繼續關注香港及中國政府所作過嘅承諾」等等。囍雨費解嘅係，以彭斯、蓬佩奧嘅地位及身份，點解有關香港、台灣以至中國內地嘅事情，要同一個香港嘅傳媒人去商討呢？唔通黎智英幫美國政府做緊嘢？佢到底扮演緊咩角色？更令人起疑嘅係，香港依家亂成咁，黎智英就走去美國「講多謝」，究竟咩意思？
反華亂港 處處有黎智英身影
囍雨就覺得，其中內情絕不簡單。事實上，好多跡象都顯示，香港近年幾次「大鑊嘢」背後，都係黎智英有份操盤。睇番回歸咁多年以嚟咁多次大型爭拗，反廿三條立法、反國教、違法「佔中」、反「一地兩檢」，處處可見黎智英嘅身影。其中違法「佔中」之後，黎智英就被揭發係盲反派嘅「幕後金主」；而今次修例風波，佢旗下嘅《生果報》就日日穀人上街。唔怪得之啲盲反派政客，成日排住隊咁去「拜見」黎智英啦。囍雨真係好奇，啲盲反派政客見完黎智英，係咪就等於見咗美國政府嘅代理人呢？但佢哋究竟咩葫蘆賣咩藥呢？
今次反修例風波，美國及盲反派策動嘅對抗行動，力度之猛烈及打擊面之深遠，都可講係歷來罕見，堪稱全球反華大合奏，呢股反華勢力會否就此收手，囍雨並不樂觀。
夥同外力 部署下一步？
依家喺香港，修訂《逃犯條例》已經壽終正寢，但囍雨相信，盲反派嘅「動作」肯定唔會就此罷休。今次黎智英去美國，一次過見埋副總統、國務卿，仲傾到「一國兩制」，以佢哋一貫嘅反華立場及「往績」，囍雨覺得，呢番動作背後，明顯就係劍指中國，極有可能已經部署緊下一步嘅行動。究竟係要繼續「食住」反修例個勢火上澆油、製造事端？定係準備另闢新戰場、向港府、中央施加壓力？務求重創一國兩制？囍雨無從猜測，但眾所周知嘅係，彭斯、蓬佩奧都係出嗮名嘅鷹派人物，任何針對中國嘅部署，都絕對來者不善。
囍雨仲要提醒大家唔好忘記，中美之間嘅貿易戰，到底會發展到咩地步，到依家都仲係未知數，外部勢力群起圍堵中國嘅意圖已經昭然若揭，喺咁嘅背景之下，希望香港繼續亂落去嘅大有人在，黎智英同班美國政客想搞乜，相信大家心中有數。香港人必須擦亮眼睛、提高警覺啦！■
Be the first to comment