青年新政梁頌恆、游蕙禎發表「支那」辱華誓詞已經差唔多一個禮拜，但到而家都依然未就事件道歉，更可悲係，社會上竟然有唔少人為佢哋開脫，有啲仲話自己聽到「支那」二字都唔覺侮辱喎。囍雨想講，如果大家連基本事實都唔願意承認，正常人嘅理性、常識同判斷力都欠奉，咁就拗落去都多餘。有人覺得「支那」二字冇感覺，其實唔出奇，你都可以話自己聽到粗口都唔覺侮辱，但唔代表嗰句唔係粗口囉！
「支那」極具侮辱性 社會有共識
如果用歷史角度睇，「支那」兩個字就肯定帶有侮辱成份，有啲人堅持認為「支那」二字冇乜問題，不過某啲字眼到底係咩意思，好多時候社會有共識，唔係話少部分人認為冇問題就冇問題。粗口、侮辱性例子囍雨就唔想多提，囍雨講一個大家都可能有印象嘅例子，就係「耆英」呢個字。
根據囍雨嘅理解，「耆英」呢個字本來係對老人家嘅尊稱，但多年前一套本地電視劇，入面有角色不斷用「耆英」二字形容一啲由老人家飾演嘅角色，一時之間搞到「耆英」呢個字好負面，一個本來尊稱老人家嘅名詞，變成形容「麻煩」老人家嘅字眼。大家認為我哋稱呼老人家做公公婆婆或者老友記係尊敬，定還是叫「耆英」好啲呢？
如果大家覺得叫老人家「耆英」好好，又會唔會用呢個詞語叫自己親人先？呢個例子可能太溫和，囍雨想帶出嘅係，一個詞語有咩意思，或者初創時係點根本唔重要，最重要係今日社會大眾點去「理解」同「感受」呢個字詞，唔係少部份或者個別人士話鍾意自行解讀就過到關。
再講深一啲，一個詞語點解釋，亦唔係剩係話字典、原本點解，而係在於社會大眾點樣用呢個字，等於大家有時睇一啲事件，事主係咪真係受到侮辱或者誹謗，都要諗下社會大眾或者正常人（Reasonable Man）對一啲字眼、陳述有咩睇法！有啲人係真心認為「支那」二字冇問題，定係一心為反政府、反建制而「硬撐」到底，大家心中有數。如果梁、游二人真心覺得自己「冇錯」，咁囍雨就呼籲佢兩個堅持唔好再宣誓喇，唔係咁衰仔跪低呀？好肉酸囉！■
Be the first to comment